Poytaxtda Botir Zokirov nomi bilan ataluvchi ,,Milliy estrada san’ati instituti” borligini bilarmidingiz?
2024-11-04 11:05:00 / Yangiliklar
Botir Zokirov o‘zbek estrada san’ati asoschisi,san’at olamida chin manodagi mo‘jiza yaratgan serqirra ijodkor.Uning o‘zbek xalqi uchun qilgan chinakam mehnatlari aslo unutilmaydi,prezidentimiz tashabbusi bilan 2022-yilda O‘zbekiston davlat konservatoriyasi huzurida Botir Zokirov nomi bilan ataluvchi ,,Milliy estrada san’ati instituti”poytaxtimizning qoq markazida tashkil etildi.
Institutida professor - o‘qituvchilar tarkibida faoliyat olib borayotgan taniqli san’atkorlar: Farrux Zokirov,Mansur Toshmatov, Gavhar Zokirova, Alisher Ikromov, Dilorom Omonullayeva,Yunus To‘rayev, Kozim Qayumov, Gulgina Zokirova va bir qancha ustozlar talaba yoshlarga o‘zining bor bilim ko‘nikmalarini berib kelmoqda. Institut rektori O‘zbekiston Respublikasida xizmat ko‘rsatgan madaniyat xodimi professor Avaz Mansurov.
"Institutda juda ham aqlli, iqtidorli,harakatchan talabalarimiz bor. Estrada san’ati bo‘yicha Botir Zokirov nomidagi xalqaro ko‘rik-tanlov va talabalar uchun davlat stipendiyasi joriy etish, badiiy film yaratish, Milliy estrada simfonik orkestri faoliyatini har tomonlama qo‘llab-quvvatlash kabi vazifalar ko‘zda tutilmoqda bu hammasi talabalarimiz uchun. Ishonamanki, davlatimiz rahbari tomonidan qilinayotgan bunday e’tibordan talabalarimizda yanada mas’uliyat, g‘ayrat uyg‘onadi. Ular uchun hamma eshiklar ochiq faqat va faqat mehnat qilish qoldi xolos. Men juda-juda xursand bo‘laman talabalarimni bilimga chanqoqligini ko‘rsam, mendan nimanidir olishni xohlasa ko‘zlaridan ilmga tashnalikni ko'rib kayfiyatim ko'tariladi. Talabalarim serqirra ijodkor bo'lishlarini juda istayman. Shu sababli, aktyorlik mahorati va sahna nutqini ham o'rganishlari tarafdoriman. Botir Zokirovni olaylik, ijodkor bir vaqtning o'zida kinoda ham rol o‘ynagan, radioda rejissyorlik qilgan. Demak har bir san'atkor nafaqat xonanda balki birinchi navbatda u aktyor bo‘lishi kerak. Qo‘shiq vaqtida musiqa chalinadi pauzada shunchaki yurish, turish emas aksincha qo‘shiq bilan yashash kerak, bu aktyorlik mahoratini talab qiladi. Uni tomoshabin ham his qiladi. Ustoz-shogird an’anasi bizda amalda, har bir o‘qituvchi o‘z talabasini tortishga mana shu olamga olib kirishga harakat qiladi, shaxsan o‘zim, g‘azal, she’r yodlattiraman, Botir Zokirov kundaligini o‘qib beraman, ustoz xonandalarimizning hayot, ijod yo‘lini ularga o‘rnak sifatida gapirib san’atga bo‘lgan muhabbatini yanada oshiraman" - deydi O‘zbekiston xalq artisti, professor Gavhar Zokirova.
Oliygoh 500 o‘ringa mo‘ljallangan bo‘lib, bakalavriat talim yo‘nalishlariga vokal san’ati, cholg‘u ijrochiligi, texnogen san’at, bastakorlik san’ati, san’atshunoslik, dirijyorlik, estrada xonandaligi, estrada cholg‘ulari hamda magistratura mutaxassisliklari bo‘yicha ayni vaqtda 500 nafarga yaqin talabalar tahsil olmoqda.
Muassasada 140 o‘rinli konsert zali, zamonaviy kompyuterlar bilan jihozlangan 8 200 dan ziyod nota va badiiy, musiqiy adabiyotlar fondi bilan to‘ldirilgan axborot resurs markazidan talabalar unumli foydalanmoqda. 40 o‘rinli oshxona va 62 ta o‘quv xonasi mavjud bo‘lib, professor-o‘qituvchilar soni: 69 ta (asosiy shtatda) 8-nafar professor, 11-nafar dotsent , 18 ta katta o‘qituvchilar o‘zbek va rus tillarida ta’lim berib kelmoqda.
"Institutimizda ustoz-shogird an’anasi yo‘lga qo‘yilgan bo'lib, o‘qituvchilarimiz o‘zining sohasida yetuk, yuksak darajaga yetgan insonlar hisoblanadi va biz ustozlarimizning har bir harakatidan yurish-turishidan , o‘zini tutishidan, so‘zlashish madaniyatidan, dars o‘tish mahoratidan har bir asarga, katta kichik ijodiy ishga professional darajada yondashganidan o‘rnak olamiz. Har bitta o‘qituvchining ovoz sozlash usullari bor, o‘zining kasbiy faoliyat uslubi bor, sodda qilib aytganda har bitta ustozning ilmda, san’at yo‘lida qiyin va mashaqqatli yo‘llari bor. Yuqorida bekorga ustoz-shogird an’anasi haqida gapirmadim shogird o‘z ustozining metodikasi davomchisi hisoblanadi. Ushbu amaliyot bizda bir necha yildan beri davom etib kelmoqda" - deydi Botir Zokirov nomidagi zamonaviy qo‘shiqchilar respublika ko‘rik tanlovi g‘olibi, institut talabasi Sevara Tulanova.
Yuqorida boshlangan ishlar o‘z mevasini bera boshlaganiga ham guvoh bo‘ldik. Institutning ko‘plab talabalari nafaqat O‘zbekistonda balki Jahonning ko‘plab davlat shaharlarida bo‘lib o‘tayotgan xalqaro musobaqalarda ishtirok etmoqda ulardan: Mamadaliyev Kamron, Tulanova Sevara, Hakimova Malika, Arxipova Anna, Moldabaev Musag‘ali, Nazarova Rigina, Umida Kazakbayeva, Rayhon Majidova, Sardor Shavkatov, Nurillo Abdullayev, Sobirova Ruxsora hamda ko‘plab institut talabalari yuqori natijalarga erishmoqda. Siz va biz televizorda tomosha qilgan X faktor, Ovoz, Artist loyihalarining ko‘zga ko‘ringan ishtirokchilari ushbu institut talabalari hisoblanadi.