Assalomu alaykum, bugungi brifingimiz O‘zbekistonda 11-14-oktyabr kunlari “Qatar madaniyati, hunarmandchiligi va milliy taomlari haftaligi” bo‘lib o‘tganligi haqida

 

Qatar O‘zbekistonning Ko‘rfaz mintaqasidagi ishonchli hamkorlaridan biriga aylanib ulgurdi. 

So‘nggi yillarda O‘zbekiston va Qatar o‘rtasidagi  hamkorlik aloqalari barcha sohalar qatori madaniyat va san’at sohasida ham tobora rivojlanib bormoqda.

  O‘zbekiston Respublikasi Prezidenti Shavkat Mirziyoyevning Qatarga, Qatar Davlati Amiri shayx Tamim bin Hamad Ol Soniyning O‘zbekistonga amalga oshirgan tashriflari davomida erishilgan kelishuvlar doirasida madaniyat sohasidagi hamkorlik aloqalari rivojlanib bormoqda.

So‘nggi yillarda ikki tomonlama madaniy hamkorlik aloqalarimiz Qatar Davlati Amirining O‘zbekistonga tashrifi doirasida
2023-yilning 5-iyun kuni imzolangan “O‘zbekiston Respublikasi Hukumati va Qatar Davlati Hukumati o‘rtasida madaniy hamkorlik to‘g‘risida memorandum” ga asosan davom etib kelmoqda.

2024-yil ikki tomonlama hamkorlik aloqalarimizda ko‘plab madaniy tadbir va almashinuvlarga boy yil bo‘lmoqda.

Xususan, 20-26-fevral kunlari Doha shahrida “O‘zbekiston madaniyati, hunarmandchiligi va turizmi kunlari” yuqori saviyada tashkil etildi.

13-19-aprel kunlari qatarlik maktab o‘quvchilari va ularning muallimlaridan iborat delegatsiya O‘zbekistonning Toshkent va Samarqand shaharlariga tashrif buyurdilar.

18-25-aprel kunlari qatarlik bir guruh blogerlar mamlakatimizga tashrif buyurib, turli hujjatli filmlar suratga oldilar.

 

Xuddi shunday hamkorlikning yana biri 11-14-oktyabr kunlari poytaxtimizning “Tashkent City Park” majmuasida “Qatar madaniyati, hunarmandchiligi va milliy taomlari haftaligi” bo‘lib o‘tdi. Unda, Qatar Davlati madaniyat vaziri Shayx Abdulrahmon bin Hamad Al-Tani boshchiligidagi 150 nafarga yaqin delegatsiya ishtirok etdi.

 

Haftalik doirasida Qatar madaniyatini aks ettiruvchi konsert dasturlari va ko‘rgazmalari poytaxt aholisi va mehmonlariga namoyish etildi. Tashkil etilgan haftalikdan ko‘zlangan asosiy maqsad: Qatar madaniyatining boy merosini tarannum etish, uning mumtoz va xalq amaliy san’ati, ijrochilik an’analari, urf-odat va marosimlarini namoyish qilish hamda Qatar bilan yo‘lga qo‘yilgan o‘zaro do‘stlik aloqalarini yanada mustahkamlashdan iboratdir.

 

Haftalik davomida Qatarning rang-barang madaniy landshafti, jumladan, san’ati, nomoddiy madaniy merosi namoyishi, milliy musiqa asboblari, minatyura va badiiy, dekorativ hamda amaliy san’at yo‘nalishlarida, shuningdek, gastronomik ko‘rgazmalar tashkil etildi.

 

Tadbirlarning tantanali ochilish marosimi joriy yilning 11-oktyabr kuni “Tashkent City Park” majmuasida joylashgan amfiteatrda tashkil etilib, konsert dasturi avvalida Qatar hunarmandchiligi ko‘rgazmasi bo‘lib o‘tdi. Shuningdek, 12-14-oktyabr kunlari davomida “Tashkent City Park” majmuasida ko‘rgazma va konsert dasturlari tashkil etildi.

 

13-oktyabr kuni O'zbekiston davlat konservatoriyasining katta zalida Qatar kompozitori Nasser Sahimning mualliflik konserti bo‘lib o‘tdi. Konsert O‘zbekiston xalq artisti Kamoliddin O‘rinboyev dirijyorligida O‘zbekiston davlat simfonik orkestri hamkorligida olib borildi.

 

Haftalik davomida O‘zbekistonga tashrif buyurgan Qatar Davlati madaniyat vaziri Shayx Abdulrahmon bin Hamad Al-Tani va O‘zbekiston Respublikasi madaniyat vaziri Ozodbek Nazarbekov o‘rtasida hamkorlik uchrashuvi bo‘lib o‘tdi.

 

14-oktyabr kuni “Qatar madaniyati, hunarmandchiligi va milliy taomlari haftaligi”ning yopilish marosimiga bag'ishlangan konsert dasturi bo‘lib o‘tdi.

 

Shuni alohida ta’kidlash joizki, so‘nggi yillarda O‘zbekiston Respublikasi bilan Qatar Davlati o‘rtasidagi madaniy aloqalar rivojlanib bormoqda. O‘zbekistonda o‘tkazib kelinayotgan xalqaro festivallarda Qatar vakillarining ishtiroki buning yaqqol dalilidir.

 

Jumladan, 2018-2024-yillarda bo‘lib o‘tgan Xalqaro maqom san’ati anjumani, 2019-yilda bo‘lib o‘tgan Xalqaro baxshi san’ati festivali,
2024-yilda o‘tkazilgan “Sharq taronalari” XIII xalqaro musiqa festivalida Qatar davlatining vakillari faol ishtirok etishdi.

 

 

Ma’lumot o‘rnida, 11-14-oktyabr kunlari poytaxtimizning “Tashkent City Park” majmuasida bo‘lib o‘tgan “Qatar madaniyati, hunarmandchiligi va milliy taomlari haftaligi” 40ga yaqin O‘zbekiston va Qatar ommaviy axborot vositalarida keng yoritildi.

 

Bizni kuzatishda davom eting, xayr salomat bo‘ling.