Bugun, 28-sentyabr kuni Madaniyat vazirligi huzuridagi Yunus Rajabiy nomidagi O‘zbek milliy musiqa san’ati institutida faoliyat yuritayotgan 17 nafar professor-o‘qituvchilarga Oliy attestatsiya komissiyasi tomonidan professorlik va dotsentlik ilmiy unvonlari berildi.

 Quvonarli tomoni shundaki, Prezidentimizning bunday tashabbuslari barcha san’at ahlini behad mamnun etgan bo‘lsa ajab emas. Endilikda O‘zbekiston xalq artistlari, O‘zbekiston xalq hofizlari va xizmat ko‘rsatgan artistlar to‘g‘ridan-to‘g‘ri professor va dotsent ilmiy unvonlariga ega bo‘lib, yoshlarga o‘z ixtisosliklari bo‘yicha bilim va ko‘nikmalarini berish bilan ahamiyatlidir.

Hozirgi kunda Yunus Rajabiy nomidagi O‘zbek milliy musiqa san’ati institutida jami 130 ga yaqin professor–o‘qituvchilar faoliyat olib bormoqda.  Institutning ilmiy salohiyati 48,3 foizni tashkil etmoqda.

 Shuningdek,  institutda tayanch doktoranturada hamda mustaqil izlanuvchi sifatida 20 nafarga yaqin yosh izlanuvchilarimiz o‘zlarining dissertatsiya ishlarini yakunlamoqda. Joriy o‘quv yilining o‘zida 12 nafar turdosh xorijiy OTMning taniqli professor-o‘qituvchilari pedagogik faoliyatga jalb etildi.

Bugungi yig‘ilishning yana bir quvonarli tarafi shundaki, ya’ni milliy musiqa san’ati sohasi bo‘yicha yosh olim va tadqiqotchilar uchun 17.00.02- Musiqa san’ati ixtisosligi bo‘yicha san’atshunoslik fanlari bo‘yicha falsafa doktori ilmiy darajasini beruvchi Ilmiy Kengash faoliyatiga ham Oliy attestatsiya kommissiyasi tomonidan ruxsat berildi.

Bugungi kunda milliy musiqa san’atining asosiy yo‘nalishi – mumtoz musiqa, maqom ijrochiligi, katta ashulla, baxshichilik va dostonchilik bo‘yicha olib borilayotgan ilmiy-tadqiqot ishlarini hamda hofiz va sozandalar, baxshi va oqinlarning ijodiy merosini ilmiy tomondan chuqur o‘rganish va tizimlashtirish institut pedagoglarining asosiy vazifasi etib belgilangan.

Institut professor – o‘qituvchilari xalqimizni madaniy merosining ajralmas bir qismi bo‘lgan milliy maqom san’ati va xalq ijodiyoti yo‘nalishlarining qadimiy tarixi, teran falsafiy ildizlari, betakror badiiy uslubi va boy ijodiy an’analari bilan ma’naviy hayotimizda alohida o‘rin egallashi, milliy o‘zligimizni anglash, milliy musiqa san’atini har tomonlama rivojlantirish, xalqimiz, avvalo, yosh avlodni yuksak insoniy tuyg‘ular ruhida tarbiyalashda milliy musiqa  san’atining o‘rni va roli beqiyos ekanligini targ‘ibot etishda ham jonbozlik  ko‘rsatib kelmoqda.

Shuningdek, istitutda yangi o‘quv yilidan faoliyatini boshlagan “Registrator ofisi” binosining tanatanali ochilish marosimi hamda 1-oktyabr – “O‘qituvchi va murabbiylar” kuni munosabati bilan “Ustoz – olamning yorug‘ chirog‘i” deya nom olgan konsert dasturi ham tashkil etildi.