#Xalqaro_hamkorlik: Ta'im
2024-09-27 14:10:00 / Yangiliklar
Kuni kecha Yunus Rajabiy nomidagi O‘zbek milliy maqom san’ati institutiga Quvaytlik mashhur kompozitor Dr. Amer Jaafar tashrif buyurdi.
Tashrif davomida, Yunus Rajabiy nomidagi O‘zbek milliy maqom san’ati instituti rektori v.v.b Eldor Shermanov hamda kompozitor Dr.Amer Jaafar o'rtasida hamkorlik uchrashuvi bo'lib o'tdi.
So'ng, Quvaytlik mashhur kompozitor Dr. Amer Jaafar Dars mashg‘ulotlarida bo‘lib, talaba-yoshlar bilan uchrashdi. Ularga Sharq musiqasining o‘ziga xosliklari, arab va turkiy xalqlar musiqa madaniyatidagi mushtaraklik, Sharq musiqa an'analarining G‘arb musiqa nazariyasidan farqi kabi dolzarb ilmiy masalalar xususida ma'lumotlar berdi.
Tashrifdan ko‘zlangan maqsad, ikki davlat ta'lim muassasalari o'rtasidagi ijodiy hamkorlikni yo‘lga qo‘yish, shuningdek, ikki mamlakat o‘rtasidagi musiqa va san’at sohasida tahsil olayotgan talabalarda 1+1 dasturini yo‘lga qo‘yishdan iborat bo‘ldi.
“Hozirda yoshlarning ko‘p qismi maqom san’atidan uzoqda. Insonlar uchun musiqa tanaga emas, ruhiyatga ijobiy ta'sir ko‘rsatishi kerak. Maqom esa qalbga, ruhiyatga davodir", — dedi kompozitor Dr.Amer Jaafar.
Uchrashuv davomida ikki davlat san’at va madaniyat sohasi vakillarini o‘zaro tajriba almashish va yaqindan tanishish maqsadida kompozitor Dr. Amer Jaafar Quvaytga Yunus Rajabiy nomidagi O‘zbek milliy maqom san’ati instituti ijodiy jamoasini taklif qilib, O‘zbek milliy musiqa san’atining konsert dasturini namoyish etishlarini taklif qildi.