O‘zbekiston Respublikasi Madaniyat vazirligi

 Mamlakatimizda musiqa san’atiga keng e’tibor qaratilgan bo‘lib,  mumtoz musiqiy merosimizni asrab-avaylash, o‘rganish va uni rivojlantirish, sayqal berish, kelajak yosh avlodlarga yetkazish, yangi yosh  musiqa ijrochilarini kashf etish, va bu san’atni dunyo miqyosiga olib chiqib, milliy musiqamiz ohanglarini tanitish kabi  ustuvor maqsadlar qo‘yilgan. Buning uchun yurtimizda  filarmoniya, milliy va jahon musiqa cholg‘ularidan tuzilgan ansambl va orkestrlar, musiqiy guruhlar mavjud. Bu jamoalarning o‘rni musiqa san’ati rivojida beqiyosdir. Mumtoz musiqiy merosimizdagi kam murojaat qilinadigan asarlarni qayta tiklash, o‘rganish, sayqallash, xalqimizga namoyish qilish jamoalarning asosiy vazifalaridandir.  Davlatimizda o‘tkaziladigan bayram tadbirlari, festivallar, konsertlarda ansambl jamoalari, orkestrlar va musiqiy guruhlar faol ishtirok etadi. Ana shunday jamoalar ichida yangi tashkil etilgan yosh musiqiy guruhlardan biri “Maqom band” guruhidir.
Bu guruh Yunus Rajabiy nomidagi “maqom” ansamblida faoliyat yuritib kelayotgan 6 nafar sozanda tomonidan  2020- yilda tashkil etilgan. Guruh tashkil qilinganiga ko‘p fursat bo‘lmagan bo‘lsada, shu vaqt mobaynida milliy san’atimiz namunalariga, shashmaqomning cholg‘u bo‘limidagi asarlarga, xalq ijodiyoti namunalariga, o‘zbek xalq va jahon bastakorlik asarlariga murojaat qilib, o‘rganib, qayta tiklab, sayqal berib sifatli video hamda audio yozuvlarga muhrlashga muvaffaq bo‘lishdi. Shular jumlasiga  Toshkent- Farg‘ona maqom yo‘llarining cholg‘u yo‘lidan “Segoh” , “Surnay Irog‘i” asarlari, Shashmaqom ashula yo‘llaridan “Saraxbori Rost taronalari”, xalq va bastakorlik kuylaridan “Gulbahor va Tanavor”, “Ne ajab va Namoyish”  “Armug‘onim”, “Tasanno”, “Jonon” kabi bir qator asarlarni kiritishimiz mumkin. Guruh sozandalari milliy musiqalarimizdan tashqari, “Besame mucho” (Besame Mucho), “Choluqushi”, “Istambul”, “Biz baxtiyor oilamiz” “Naz elama”, “Sariay”, “Jazira”, “Alatau” “Podmoskovniye vechera”, “Katyusha” kabi xalqimiz tomonidan sevib tinglanadigan jahon asarlarini ham ijro qilishadi.  
Guruh bir qator davlat tadbirlarida, bayramlarda, qabul marosimlarida konsert dasturlarida xam o‘zining ijodiy repertuarlari bilan faol qatnashib kelmoqda.
Guruhda chang va  qonun sozida Ziyodjon Rozimov, ud sozida Orziyev Odil, g‘ijjak sozida  Mirkomil Ergashev,  rubob cholg‘usida Mansur Mo‘minov, nay sozida Ergashev Azamat, doira cholg‘usida Sharofiddin Alimaxsumov, va elektron urma cholg‘uda Aliyev Murodjon, sintezator elektron cholg‘uda Nosirov Dostonbek o‘z faoliyatlarini olib boradilar.
Bu sozandalar oddiy emas balki ustoz sozandalarning shu kunga qadar davom ettirgan san’atini chirog‘ini yoqib o‘tiruvchi, va san’atni qo‘ldan kelgancha rivojlantirib, asrab-avaylab xalqimizga e’tiboriga va kelajak avlodga yetkazib berishni o‘zi zimmasiga olgan davomchilardan sanaladi.