O‘zbekiston Respublikasi Tog‘-kon sanoati va geologiya vazirligi huzuridagi Tog‘-kon sanoati va geologiya sohasini nazorat qilish inspeksiyasi

Inspeksiyada ushbu yo‘nalishdagi faoliyat O‘zbekiston Respublikasining 2017-yil 11-sentabrdagi “Jismoniy va yuridik shaxslarning murojaatlari to‘g‘risida”gi O‘zbekiston Respublikasi Qonuniga o‘zgartirish va qo‘shimchalar kiritish haqida”gi O‘RQ-445-sonli Qonuni talablari asosida tashkil etilgan bo‘lib, ijro sifati va samaradorligini tubdan yaxshilashga xizmat qilmoqda. Aholiga qulaylik yaratish maqsadida Inspeksiya boshlig‘ining virtual qabulxonasi, maxsus ishonch telefoni, @kontexnazorat_murojaat_bot rasmiy telegram kanali hamda rasmiy veb-saytdagi onlayn maslahatchi moduli uzluksiz ishlab turibdi.

Davlat rahbari huzurida 2026-yil 13-mart kuni murojaat ko‘rib chiqish tizimini takomillashtirish bo‘yicha o‘tkazilgan videoselektor yig‘ilishida belgilangan ustuvor vazifalar ijrosini ta’minlash maqsadida, joriy yilning birinchi yarim yilligi davomida Inspeksiya boshlig‘i va uning o‘rinbosari tomonidan Andijon hamda Farg‘ona viloyatlarida sayyor qabullar tashkil etildi. Ushbu ochiq muloqotlar davomida kelib tushgan murojaatlar atroflicha o‘rganilib, ularning salmoqli qismi joyida hal etildi. Vaqt talab qiladigan masalalar bo‘yicha esa aniq muddatlar belgilangan chora-tadbirlar rejasi ishlab chiqilib, ijroga yo‘naltirildi.

Inspeksiyaga 2026-yil 2-iyun holatiga ko‘ra, jismoniy va yuridik shaxslardan jami 146 ta murojaat kelib tushgan bo‘lib, ularning hududlar kesimidagi tahlili quyidagicha:

• Qashqadaryo viloyati — 31 ta

• Buxoro viloyati — 27 ta

• Navoiy viloyati — 21 ta

• Surxondaryo viloyati — 17 ta

• Toshkent viloyati — 14 ta

• Namangan viloyati — 9 ta

• Andijon viloyati — 9 ta

• Farg‘ona viloyati — 8 ta

• Samarqand viloyati — 5 ta

• Toshkent shahri — 5 ta

Kelib tushish kanallari bo‘yicha tahlil qilinganda, murojaatlarning 83 tasi Prezident virtual qabulxonasi orqali, 49 tasi elektron shaklda hamda 14 tasi Inspeksiyaning ishonch telefoni orqali qabul qilingan.

Inspeksiya mas’ullari tomonidan har bir murojaat qonuniy ko‘rib chiqilishi natijasida, ularning 119 tasi qanoatlantirildi. Murojaatlarning 20 tasi Inspeksiya vakolatiga kirmaganligi bois, qonunchilikda belgilangan tartibda tegishli tashkilotlarga yuborildi. Bugungi kunda 7 ta murojaatni ko‘rib chiqish jarayoni davom etmoqda va ular bo‘yicha yakuniy qarorlar qisqa muddatlarda qabul qilinadi.

Inspeksiya aholi va soha vakillaridan kelib tushayotgan har bir murojaatga tizimdagi kamchiliklarni bartaraf etish hamda ish sifatini oshirishning muhim mezoni sifatida qaraydi. Ochiqlik, shaffoflik va qonun ustuvorligi bundan buyon ham faoliyatimizning bosh tamoyili bo‘lib qoladi.