To‘g‘-kon sanoati va geologiya sohasini nazorat qilish inspeksiyasi shartnoma majburiyatini bajarmagan tadbirkordan penya undiradi
2026-05-25 10:05:00 / Yangiliklar
2025-yil 10-dekabrda inspeksiya va F. MChJ o‘rtasida maxsus axborot portali orqali 39***-sonli tovar yetkazib berish shartnomasi imzolangan edi. Shartnomaga muvofiq, tadbirkor jami 520 000 000 so‘mlik uchuvchisiz uchish apparati (DJI Matrice 400 droni va uning butlovchi qismlari) yetkazib berish majburiyatini olgan. Inspeksiya tomonidan to‘lov to‘liq amalga oshirilgan bo‘lsa-da, tovar belgilangan 20 ish kuni ichida yetkazib berilmadi.
Nizo sudgacha hal qilinmagach va 2026-yil 7-apreldagi talabnoma javobsiz qolgach, inspeksiya ilgari o‘tkazilgan 520 000 000 so‘m mablag‘ni qaytarib oldi. Biroq, mablag‘ning qaytarilishi yetkazib beruvchini kechikkan har bir kun uchun javobgarlikdan ozod etmaydi. Majburiyat 91 kun davomida bajarilmaganligi sababli, shartnomaning 4.3-bandi va O‘zbekiston Respublikasining “Xo‘jalik yurituvchi subyektlar faoliyatining shartnomaviy-huquqiy bazasi to‘g‘risida”gi Qonunining 25-moddasiga asosan 236 600 000 so‘m penya hisoblandi.
Toshkent tumanlararo iqtisodiy sudi da'vogarning talabini qisman qondirib, 50 000 000 so‘m penya hamda sud xarajatlarini undirish yuzasidan qaror chiqardi. Bu kabi qat’iy choralar tadbirkorlik subyektlarining davlat buyurtmalari oldidagi mas’uliyatini oshirishga xizmat qiladi. Nazorat tizimining bunday tartibda ishlashi shartnomaviy intizomni buzish holatlarining oldini oladi va davlat manfaatlarini huquqiy himoya qilishning samarali mexanizmi bo‘lib xizmat qiladi.
J. Bozorxonov - Bosh yuriskonsult