Geologiya fanlari universitetida zamonaviy boshqaruv va yetakchilik masalalari muhokama qilindi
2026-05-14 11:55:00 / Yangiliklar
O‘zbekiston Respublikasi Tog‘-kon sanoati va geologiya vazirligi tizimida boshqaruv samaradorligini oshirish hamda zamonaviy yetakchilik ko‘nikmalarini shakllantirish masalalari davlat siyosatining ustuvor yo‘nalishlaridan biri hisoblanadi. Shu munosabat bilan, 2026-yil 14-may kuni Geologiya fanlari universiteti binosida soha rahbarlari va mutaxassislari uchun xalqaro ekspertlar ishtirokida maxsus seminar-forum tashkil etildi.
Tadbirning asosiy maqsadi tashkiliy madaniyatni transformatsiya qilish, boshqaruvda innovatsion yondashuvlarni joriy etish va kadrlar salohiyatini mustahkamlashdan iborat. Forumda vazirlik tizimidagi tashkilot rahbarlari va ularning o‘rinbosarlari ishtirok etib, yetakchilikning xalqaro standartlari va amaliy vositalari bilan tanishdilar.
Seminar ishini Geologiya fanlari universiteti rektori A.A. Qodirxo‘jayev ochib berib, forumning maqsad va vazifalariga to‘xtalib o‘tdi. Shundan so‘ng, KfW IPEX-Bankning Sharqiy Yevropa, Markaziy Osiyo va Janubiy Kavkaz bo‘yicha direktori Yekaterina Galitsina moderatorligida asosiy sessiyalar boshlandi.
Birinchi sessiyada Amsterdam erkin universiteti (Vrije Universiteit Amsterdam) professori Svetlana Xapova “Yetakchilik, sukut saqlash va ifoda etilmagan xatarlar” mavzusida ma’ruza qildi. Unda zamonaviy tashkilotlarda yetakchilikka bo‘lgan yangicha yondashuvlar hamda jamoada ochiq muloqot muhitini yaratishning ahamiyati muhokama qilindi.
Ikkinchi sessiya doirasida esa tashkiliy rivojlanish va innovatsion yondashuvlar masalalari ko‘rib chiqildi. Ishtirokchilar Germaniya va Niderlandiya kabi davlatlarning ilg‘or boshqaruv tajribalari, o‘zgarishlarni boshqarish mexanizmlari hamda jamoalarni rivojlantirishning samarali usullari bo‘yicha amaliy ko‘nikmalarga ega bo‘ldilar.