Shimoliy mintaqada korrupsiyaga qarshi kurashish bo‘yicha seminar o‘tkazildi
2026-04-22 17:05:00 / Yangiliklar
Tadbirda Inspeksiya boshlig‘i o‘rinbosari Omonulla Zaripov hamda Korrupsiyaga qarshi kurashish bo‘yicha bosh mutaxassis Jamshid Zikirov ishtirok etib, sohadagi ichki normativ hujjatlarning mazmun-mohiyatini xodimlarga yetkazdi. Seminar davomida sohaga oid qonunchilik talablari, korrupsiyaviy xavf-hatarlarni baholash va ularga nisbatan murosasiz munosabatda bo‘lish masalalari diqqat markazida bo‘ldi.
Mutaxassislar tomonidan korrupsiyaga qarshi kurashish sohasidagi ichki nazorat tizimi — komplayens-nazoratning ishlash mexanizmlari batafsil tushuntirildi. Shuningdek, xodimlarning xizmat vazifalarini bajarishda manfaatlar to‘qnashuviga yo‘l qo‘ymaslik, odob-axloq qoidalariga rioya etish hamda sohada qonuniylikni mustahkamlash bo‘yicha aniq ko‘rsatmalar berildi.
Nazorat tizimining bunday tartibda yo‘lga qo‘yilishi faoliyat samaradorligini oshirish bilan birga, davlat mulki va resurslaridan oqilona foydalanishni kafolatlaydi. Korrupsiyaviy omillarning bartaraf etilishi geologiya va tog‘-kon sanoati sohasida shaffoflikni ta’minlab, iqtisodiy barqarorlikka xizmat qiladi.
Profilaktika tadbirlari va monitoring mexanizmlarining kuchaytirilishi kelgusida tizimda huquqbuzarliklar sonini kamaytirish hamda soha rivojiga to‘sqinlik qiluvchi byurokratik to‘siqlarni yo‘q qilish imkonini beradi. Bu esa o‘z navbatda davlat nazorat organlariga bo‘lgan xalq ishonchini yanada mustahkamlaydi.