“Sharg‘unko‘mir” AJ konlarida favqulodda vaziyatlarning oldini olish bo‘yicha maxsus taktik o‘quv mashg‘ulotlari o‘tkazildi
2026-04-13 09:55:00 / Yangiliklar
Mashg‘ulotlarda Janubiy mintaqaviy inspeksiya inspektori Sh.Q.Xoliqov, mutaxassislar U.Mallayev, J.Ro‘ziyev hamda korxonaning mas’ul rahbarlari bevosita ishtirok etishdi. Tadbirning asosiy vazifasi kon sharoitida sodir bo‘lishi mumkin bo‘lgan kutilmagan avariyalarni bartaraf etish jarayonida davlat nazorat organlari va qutqaruv xizmatlarining hamkorlikdagi harakatlarini muvofiqlashtirishdan iborat bo‘ldi.
O‘quv mashqlari Harbiylashtirilgan kon-qutqaruv shtabining 2026-yil 21-yanvardagi 10-sonli buyrug‘i ijrosini ta’minlash doirasida, 1-Alohida harbiylashtirilgan kon qutqaruv vzvodi bilan yaqin hamkorlikda amalga oshirildi. Mazkur buyruq konlarda xavfsizlik darajasini doimiy nazorat qilish va qutqaruv bo‘linmalarining shayligini sinovdan o‘tkazishni nazarda tutadi.
Jarayon davomida asosiy e’tibor shartli ravishda yuzaga kelgan yong‘in va avariyalarni tezkorlik bilan bartaraf etishga qaratildi. Qutqaruvchilar va korxona xodimlari jabrlanuvchilarni zaharli gazlar to‘plangan hududlardan xavfsiz joyga (toza havoga) olib chiqish, ularga shoshilinch tibbiy yordam ko‘rsatish va professional tibbiyot xodimlariga topshirish bosqichlarini amalda namoyish etishdi. Shuningdek, texnogen vaziyatlarning oldini olish bo‘yicha mutaxassislar tomonidan tegishli profilaktik ko‘rsatmalar berildi.
Tadbir yakunida inspeksiya mutaxassislari konlarda xavfsizlik qoidalariga rioya etishning muhim jihatlari yuzasidan xodimlar bilan tushuntirish ishlarini olib bordilar. Bu kabi taktik mashqlar ish joylarida nafaqat texnik uskunalar shayligini, balki inson omili bilan bog‘liq xavflarni kamaytirishga, xodimlarning hushyorligi va professional ogohligini oshirishga xizmat qiladi.
Bunday tizimli nazorat va amaliy tayyorgarlik tadbirlari ishlab chiqarish samaradorligini oshirish bilan birga, mehnat muhofazasining qonuniy asoslarini mustahkamlaydi. Nazorat tizimining kuchayishi konchilik sanoatida og‘ir oqibatli baxtsiz hodisalarning oldini olish va davlat iqtisodiy manfaatlari bo‘lgan ko‘mir qazib olish jarayonining uzluksizligini ta’minlashda strategik ahamiyatga ega.
Sanoat xavfsizligi talablariga qat’iy rioya qilinishi korxonalarning barqaror rivojlanishi va ishchilar salomatligini muhofaza qilishning bosh garovidir. Shu munosabat bilan, barcha soha tashkilotlari va aholi ushbu profilaktik oylik doirasida xavfsizlik madaniyatini yuksaltirishga chaqiriladi.