Angren kon-texnika inspeksiyasi tomonidan sanoat xavfsizligini ta’minlash borasidagi nazorat tadbirlari kuchaytirilmoqda
2026-04-13 09:45:00 / Yangiliklar
Hozirgi vaqtda inspeksiya mutaxassislari tomonidan ikkita og‘ir baxtsiz hodisa yuzasidan maxsus tekshiruv ishlari olib borilmoqda. Xususan, “O‘zbekko‘mir” AJ tarkibidagi “Temir yo‘l transporti” filiali elektrovoz mashinisti yordamchisi U.B.ning jarohatlanishi holati atroflicha o‘rganilmoqda. Shuningdek, “O‘zbek geologiya qidiruv” AJning “Tuyachovul” uchastkasida haydovchi Q.N. tomonidan olingan og‘ir tan jarohati sabablarini aniqlash maqsadida tuzilgan maxsus komissiya o‘z ishini davom ettirmoqda.
Tabiiy va texnogen xavflarning oldini olish maqsadida A-373 “Toshkent-Andijon” xalqaro avtomobil yo‘lining 99-101 kilometrlari oralig‘ida hosil bo‘lgan ko‘chki yoriqlari doimiy nazoratga olindi. Ushbu hudud Favqulodda vaziyatlar vazirligi hamda “O‘zbekgidrogeologiya” mutaxassislari ishtirokida joyida o‘rganilib, xavf darajasi tahlil qilindi. Bu kabi tadbirlar transport harakati xavfsizligini ta’minlashda muhim ahamiyat kasb etadi.
Shu bilan birga, tadbirkorlik subyektlarining huquqiy va texnik asoslarini tartibga solish ishlari ham davom etmoqda. “SHAIKH THE ROAD” mas’uliyati cheklangan jamiyatiga tog‘-kon ishlarini olib borish huquqini beruvchi ijobiy xulosa rasmiylashtirib berildi. “ANGREN GUMAT KO‘MIR” mas’uliyati cheklangan jamiyatining ko‘mir zaxiralari bo‘yicha 5-GR shaklidagi hisobot balansi mutaxassislar tomonidan qayta ko‘rib chiqildi va o‘rganildi.
Xodimlarning ekstremal sharoitlarda harakat qilish ko‘nikmalarini oshirish maqsadida “Temir yo‘l transporti” filialida maxsus taktik o‘quv mashg‘uloti o‘tkazildi. Seminar davomida ishchi-xizmatchilarga zilzila, yong‘in va kimyoviy xavflardan himoyalanish usullari amaliy tushuntirildi. “BAB ENERGY VE PETROL URUNLERI AS” mas’uliyati cheklangan jamiyatida esa xodimlarning elektr xo‘jaligidan foydalanish bo‘yicha bilimlari sinovdan o‘tkazilib, ularning malakasi baholandi.
Amalga oshirilgan ushbu tadbirlar konchilik va geologiya sohasida mehnat muhofazasining naqadar dolzarb ekanligini ko‘rsatadi. Nazorat tizimining kuchayishi ishlab chiqarish jarayonidagi xavf-xatarlarni minimal darajaga tushirishga va davlat mulkidan oqilona foydalanishni ta’minlashga xizmat qiladi.
Sanoat korxonalarida texnik xavfsizlik va qonun ustuvorligining ta’minlanishi nafaqat iqtisodiy barqarorlikni, balki har bir ishchining xavfsiz mehnat sharoitida faoliyat yuritishini kafolatlaydi. Kelgusida ham inspeksiya tomonidan qat’iy monitoring mexanizmlari qo‘llanilishi va profilaktika ishlari muntazam davom ettirilishi belgilangan.