O‘zbekiston Respublikasi Tog‘-kon sanoati va geologiya vazirligi huzuridagi Tog‘-kon sanoati va geologiya sohasini nazorat qilish inspeksiyasi

Tog‘-kon sanoati va geologiya sohasini nazorat qilish inspeksiyasi 2025-yil yakunlari bo‘yicha o‘tkazilgan reyting baholashda keskin ijobiy natija qayd etdi. Inspeksiya jami 100 balldan 92 ball to‘plab, o‘z faoliyat samaradorligini “a’lo” darajaga ko‘tardi. Bu ko‘rsatkich tashkilotda korrupsiyaga nisbatan murosasizlik muhiti tizimli ravishda shakllanganidan dalolat beradi.

Baholash jarayoni O‘zbekiston Respublikasi Korrupsiyaga qarshi kurashish agentligining “E-Anticor.uz” elektron platformasi orqali amalga oshirildi. Jarayonda Agentlik mutaxassislari bilan birga 9 nafar mustaqil ekspertdan iborat komissiya a’zolari ishtirok etdi. Inspeksiya faoliyati 5 ta muhim yo‘nalishdagi 29 ta indikator asosida sinchiklab o‘rganildi.

Xususan, inspeksiyada korrupsiyaga qarshi kurashishning huquqiy asoslari yaratilganligi, korrupsiyaviy xavf-xatarlarning to‘g‘ri baholanishi va ularni bartaraf etish choralari yuqori baholandi. Shuningdek, rahbarlarning ushbu illatga qarshi shaxsiy namunasi va xodimlarning huquqiy savodxonligini oshirish bo‘yicha qilingan ishlar ham tahlil qilindi. Aholi o‘rtasida o‘tkazilgan targ‘ibot tadbirlarining samaradorligi ham yakuniy ballga ijobiy ta’sir ko‘rsatdi.

Ta’kidlash joizki, ushbu natija tizimli mehnat mahsulidir. Zero, Inspeksiya 2022-yilda 34 ball, 2023-yilda 21 ball va 2024-yilda 0 ball bilan “qoniqarsiz” toifasida bo‘lgan. Qisqa vaqt ichida korrupsiyaga qarshi kurashish bo‘limi tomonidan xalqaro standartlarning joriy etilishi vaziyatni tubdan o‘zgartirdi. Buning e’tirofi sifatida 2026-yil 6-aprel kuni Korrupsiyaga qarshi kurashish agentligi tomonidan Inspeksiyaga maxsus minnatdorchilik xati taqdim etildi.

Reyting natijalariga ko‘ra, faoliyati “yaxshi” deb topilgan tashkilotlarning ijobiy tajribasini ommalashtirish va mas’ul xodimlarni rag‘batlantirish ko‘zda tutilgan. Aksincha, samaradorlik past bo‘lgan idora rahbarlariga intizomiy choralar ko‘rilishi belgilangan. Inspeksiya erishgan 92 ball nafaqat jamoaning yutug‘i, balki sohada nazorat tizimining shaffoflashganidan dalolatdir.

Ushbu yutuq davlat nazorati organlarida qonuniylik ta’minlanishi iqtisodiy barqarorlikning garovi ekanligini ko‘rsatadi. Korrupsiyadan xoli muhit investitsiyalar oqimini ko‘paytiradi va resurslarning maqsadsiz sarflanishiga chek qo‘yadi. Inspeksiya kelgusida ham bu boradagi nazorat mexanizmlarini yanada kuchaytirishni maqsad qilgan.