O‘zbekiston Respublikasi Tog‘-kon sanoati va geologiya vazirligi huzuridagi Tog‘-kon sanoati va geologiya sohasini nazorat qilish inspeksiyasi

Fuqarolar va tadbirkorlik subyektlari o‘zlarini qiynayotgan masalalar yuzasidan Inspeksiyaning maxsus aloqa kanallari, jumladan, ishonch telefoni, @kontexnazorat_murojaat_bot telegram boti hamda rasmiy veb-saytdagi onlayn maslahatchi moduli orqali murojaat qilish imkoniyatiga ega. Bu esa murojaatchilarning vaqtini tejash bilan birga, davlat organi faoliyatining ochiqligini ta’minlashga xizmat qilmoqda.

Davlat rahbari huzurida 2026-yil 13-mart kuni o‘tkazilgan videoselektor yig‘ilishida berilgan topshiriqlar ijrosi doirasida joriy yilning birinchi choragida Andijon va Farg‘ona viloyatlarida sayyor qabullar tashkil etildi. Ushbu tadbirlar davomida bevosita joylarda fuqarolar bilan uchrashilib, ularning muammolari tinglandi. Sayyor qabullar natijasida aniqlangan masalalarni hal etish uchun alohida chora-tadbirlar rejasi ishlab chiqilib, ijro muddatlari qat’iy belgilandi. Muhimi shundaki, ko‘plab murojaatlar ijrosi Inspeksiya rahbariyati tomonidan joyida hal etildi.

2026-yilning birinchi choragi davomida Inspeksiyaga jismoniy va yuridik shaxslardan jami 52 ta murojaat kelib tushdi. Hududlar kesimida tahlil qilinganda, eng ko‘p murojaatlar Toshkent viloyati (11 ta), Jizzax viloyati (10 ta) hamda Buxoro viloyatiga (6 ta) to‘g‘ri kelishi aniqlandi. Shuningdek, Toshkent shahridan 5 ta, Navoiy va Andijon viloyatlaridan 4 tadan, Xorazm va Surxondaryodan 3 tadan, Samarqanddan 2 ta hamda Qoraqalpog‘iston Respublikasi, Namangan, Farg‘ona va Qashqadaryo viloyatlaridan 1 tadan murojaat qayd etilgan.

Murojaatlarning manbalari bo‘yicha tahlili shuni ko‘rsatadiki, asosiy qism, ya’ni 39 tasi O‘zbekiston Respublikasi Prezidentining virtual qabulxonasi orqali kelib tushgan. Bundan tashqari, 6 ta murojaat elektron shaklda, yana 6 tasi ishonch telefoni orqali hamda 1 tasi Xalq qabulxonalari orqali taqdim etildi. Bu ko‘rsatkichlar aholining raqamli tizimlar va markazlashgan qabulxonalar orqali o‘z huquqlarini himoya qilishga bo‘lgan ishonchi ortib borayotganini ko‘rsatadi.

Hisobot davri yakuniga ko‘ra, kelib tushgan murojaatlarning 26 tasi to‘liq qanoatlantirildi. 18 ta murojaat ko‘rib chiqish jarayonida ko‘tarilgan masalalar Inspeksiya vakolati doirasiga kirmasligi sababli tegishliligi bo‘yicha mutasaddi tashkilotlarga yuborildi. Hozirgi kunda qolgan 8 ta murojaat bo‘yicha o‘rganish ishlari davom ettirilmoqda va ular qonunda belgilangan muddatlarda ko‘rib chiqilishi nazoratga olingan.

Ushbu statistik ma’lumotlar va o‘tkazilgan tadbirlar natijasi shuni ko‘rsatadiki, Inspeksiya tizimida murojaatlar bilan ishlash shunchaki rasmiyatchilik emas, balki aholining real muammolarini hal etishga qaratilgan amaliy jarayondir. Sayyor qabullar va raqamli platformalar orqali yo‘lga qo‘yilgan aloqa tizimi boshqaruvda shaffoflikni ta’minlash barobarida, ijro intizomini mustahkamlashga xizmat qiladi.

Aholi murojaatlari bilan tizimli ishlash va ularni qanoatlantirish ko‘rsatkichlarining yuqoriligi jamiyatda qonun ustuvorligini ta’minlashning muhim omilidir. Bu kabi yondashuv nazorat organlarining xalq oldidagi mas’uliyatini oshirish bilan birga, hududlardagi ijtimoiy-iqtisodiy masalalarni operativ tarzda o‘rganish va bartaraf etish imkonini beradi.