Yer qa’ridan noqonuniy foydalangan shaxsga nisbatan sud hukmi o‘qildi: davlatga 914 million so‘mdan ortiq zarar yetkazilgan
2026-04-03 09:05:00 / Yangiliklar
Mazkur holat Tog‘-kon sanoati va geologiya sohasini nazorat qilish inspeksiyasi tomonidan o‘tkazilgan nazorat tadbirlari davomida aniqlangan edi. Tergov va sud jarayonida ma’lum bo‘lishicha, “G.M.B.” MChJ rahbari va “V.” MChJ ta’sischisi bo‘lgan fuqaro B.A. 2020–2024 yillar davomida Ohangaron tumanidagi “Eyvalek-6” kon maydoni va unga tutash hududlarda belgilangan tartibda litsenziya olmasdan faoliyat yuritgan.
Sudlanuvchi B.A. o‘z mansab vakolatlarini suiiste’mol qilgan holda, kon chegarasidan tashqariga chiqib va belgilangan chuqurlikdan pastga tushib, jami 76 500,16 kub metr lyossimon jinslarni noqonuniy qazib olgan. Ushbu xom ashyodan o‘ziga qarashli zavodda pishgan g‘isht ishlab chiqarib, sotish orqali mo‘may daromad orttirishni maqsad qilgan.
Nazorat organi va marksheyderlik xizmati mutaxassislari tomonidan o‘tkazilgan o‘lchovlar natijasida yer qa’riga yetkazilgan iqtisodiy zarar miqdori 914 176 912 so‘mni tashkil etgani tasdiqlandi. Ushbu zarar miqdori tovarshunoslik ekspertizasining tuproqning o‘rtacha bozor bahosi (bir kub metr uchun 11 950 so‘m) asosidagi xulosasiga tayanadi.
Sud jarayonida ayblanuvchi o‘z aybiga to‘liq iqror bo‘lib, noqonuniy harakatlarini qarzdorlik majburiyatlarini yopish istagi bilan izohladi. Shuningdek, u yetkazilgan zarar miqdorini to‘liq qoplaganini va qilmishidan pushaymonligini bildirib, suddan yengillik so‘radi.
Jinoyat ishlari bo‘yicha Ohangaron tuman sudi B.A.ni O‘zbekiston Respublikasi Jinoyat kodeksining 192-11-moddasi 2-qismi “a” bandi (Nodavlat tijorat tashkilotida yoki boshqa nodavlat tashkilotida mansabdor shaxslar tomonidan o‘z vakolatlarini suiiste’mol qilish) va 229-moddasi (O‘zboshimchalik) bilan aybdor deb topdi. Yetkazilgan zarar summasi bo‘lgan 914 176 912 so‘m davlat foydasiga undirilishi belgilandi.
Ushbu holat davlat nazorat organlari tomonidan yer qa’ridan foydalanish sohasida qonuniylikni ta’minlash borasidagi ishlar qat’iy davom ettirilayotganini ko‘rsatadi. Noqonuniy qazish ishlari nafaqat davlat iqtisodiyotiga zarar yetkazadi, balki tabiiy resurslarning tartibsiz sarflanishiga va ekologik muvozanatning buzilishiga olib keladi.
Bu kabi qat’iy choralarning ko‘rilishi tadbirkorlik subyektlari o‘rtasida sog‘lom raqobat muhitini shakllantirishga xizmat qiladi. Qonuniy yo‘l bilan litsenziya olib ishlayotgan tadbirkorlar manfaatlarini himoya qilish hamda tabiiy boyliklardan oqilona foydalanish Inspeksiyaning doimiy diqqat markazida bo‘lib qoladi.