O‘zbekiston Respublikasi Tog‘-kon sanoati va geologiya vazirligi huzuridagi Tog‘-kon sanoati va geologiya sohasini nazorat qilish inspeksiyasi

Joriy yilning mart oyi davomida viloyatning chekka hududlarida istiqomat qiluvchi kam ta’minlangan va ijtimoiy himoyaga muhtoj fuqarolar uchun iftorlik dasturxonlari yozildi. Xususan, Tomdi tumanidagi "Ariannna" kafesi hamda Uchquduq shahridagi "Abdulaziz" tantanalar saroyida o‘tkazilgan tadbirlar nuroniylar, boquvchisini yo‘qotgan oilalar va moddiy ko‘makka muhtoj shaxslarni bir dasturxon atrofida jamladi. Bunday xayriya kechalari inson qadrini ulug‘lash va xalqimizga xos olijanob fazilatlarni yuksaltirishda alohida ahamiyatga ega.

Tadbirlarda Tog‘-kon sanoati va geologiya sohasini nazorat qilish inspeksiyasi boshlig‘i, Navoiy kon-metallurgiya kombinati aksiyadorlik jamiyati rahbariyati hamda tuman hokimlari ishtirok etdilar. Rahbarlarning aholi bilan bir safda turib, ularning kundalik ehtiyojlari va muammolaridan xabardor bo‘lishi davlat idoralarining xalqchil siyosatini amalda namoyon etdi. Ishtirokchilar davlatimiz tomonidan ko‘rsatilayotgan alohida e’tibor va ijtimoiy g‘amxo‘rlikdan mamnun ekanliklarini bildirdilar.

Fayzli dasturxon atrofida Qur’on oyatlari tilovat qilinib, yurtimiz tinchligi, xalqimiz farovonligi va amalga oshirilayotgan islohotlar bardavomligini so‘rab duolar qilindi. Ma’naviy suhbatlar davomida jamiyatda ahillik va shukronalik hissini shakllantirish, yoshlarni vatanparvarlik ruhida tarbiyalash masalalariga to‘xtalib o‘tildi. Shuningdek, tadbirlar doirasida ehtiyojmand oilalarning yashash sharoitlari o‘rganilib, ularni moddiy qo‘llab-quvvatlash bo‘yicha kelgusidagi vazifalar belgilab olindi.

Ushbu xayriya tadbirlarining tashkil etilishi nazorat organlari faoliyatining nafaqat qonun ustuvorligini ta’minlash, balki ijtimoiy mas’uliyatni his etish qismidir. Nazorat tizimining xalq bilan hamnafas ishlashi jamiyatda barqarorlikni saqlashning muhim omili hisoblanadi. Bunday manzilli yordam mexanizmlari aholining davlat idoralariga bo‘lgan ishonchini yanada mustahkamlashga zamin yaratadi.

Davlatimiz rahbari tomonidan ilgari surilgan "inson qadri uchun" tamoyili asosida amalga oshirilayotgan bu kabi ishlar iqtisodiy rivojlanish bilan bir qatorda ma’naviy yuksalishni ham ta’minlaydi. Qonuniylik ta’minlangan va ijtimoiy adolat qaror topgan jamiyatda har bir fuqaro o‘zini himoyalangan his etadi. Bu esa o‘z navbatida mamlakatimiz iqtisodiy qudratini oshirish yo‘lidagi islohotlar samaradorligini kafolatlaydi.