8 mart – Xalqaro xotin-qizlar kuni munosabati bilan Tog‘-kon sanoati va geologiya sohasini nazorat qilish inspeksiyasi boshlig‘i Adilov Jasur Magrupovichning bayram tabrigi
2026-03-06 17:00:00 / Rahbariyatning bayonotlari va nutqlari
Assalomu alaykum, aziz va muhtarama hamkasblar!
Qadrli opa-singillar!
Avvalo, Sizlarni, go‘zal bahor faslining ilk ayyomi — 8 mart – Xalqaro xotin-qizlar kuni bilan inspeksiyamiz jamoasi va shaxsan o‘z nomimdan chin qalbimdan muborakbod etaman.
Bugungi qutlug‘ kunda biz nafaqat hayotimizning fayzi bo‘lgan ayollarimizni sharaflaymiz, balki davlatimiz taraqqiyotida, xususan, mamlakatimiz iqtisodiy qudratini belgilovchi tog‘-kon va geologiya sohasida fidokorona mehnat qilayotgan olima, muhandis va nazoratchi ayollarimizning matonatiga alohida ehtirom ko‘rsatamiz.
Muhtarama opa-singillar!
Yer osti boyliklarini qidirib topish, ularni asrab-avaylash va sohada qat’iy nazoratni o‘rnatishdek mashaqqatli ishda sizlarning bilim va tajribangiz, eng muhimi, mas’uliyat bilan yondashishingiz biz uchun beqiyos kuchdir. Muhtaram Yurtboshimiz ta’kidlaganlaridek, ayolning roziligi — jamiyatning roziligidir.
2026 yilga kelib, sohamizda raqamlashtirish va yuqori texnologiyalarni qo‘llash yangi bosqichga chiqdi. Bu jarayonda siz ayollarning zamonaviy bilimlarni egallab, sohani nazorat qilishdagi ishtirokingiz Yangi O‘zbekiston taraqqiyotiga qo‘shilayotgan munosib hissadir.
Aziz hamkasblar!
Xalqimiz ayollarni hamisha e’zozlab kelgan. Sizlarning nafosatingiz va qalb haroratingiz oilalarimizni mustahkam, xonadonlarimizni nurafshon qilib turadi. Inspeksiyamizning zahmatkash ayollari o‘z kasbiy faoliyatlarida qat’iyatli bo‘lish bilan birga, oilada mehribon ona, vafoli yor sifatida ham ibrat namunasidir.
Ushbu go‘zal bahor bayramida barchangizga mustahkam sog‘liq, oilaviy baxt va sharafli ishlaringizda ulkan zafarlar tilayman. Bahor gullaridek hamisha go‘zal, tabassum va quvonch hamrohingiz bo‘lsin!
Iqbolingiz baland, umringiz uzoq va rizqingiz ziyoda bo‘lsin!
Bayramingiz muborak bo‘lsin, aziz ayollar!