O‘zbekiston Respublikasi Tog‘-kon sanoati va geologiya vazirligi huzuridagi Tog‘-kon sanoati va geologiya sohasini nazorat qilish inspeksiyasi

Xususan, Inspeksiyaning 2025 yil uchun «Korrupsiyaga qarshi kurashish dasturi» tasdiqlanib sohada korrupsiyani oldini olish va bartaraf etish yuzasidan chora-tadbirlar belgilab olindi.

Shuningdek, «Korrupsiyaga qarshi kurashish siyosati», «Odob-axloq qoidalari», «Manfaatlar to‘qnashuvini boshqarish Nizomi», «Ishga nomzodlarni tekshirish bo‘yicha Yo‘riqnoma», «Sovg‘alarni olish va berish siyosati», «Kontragentlarni tekshirishga oid Yo‘riqnoma» «Xavf-xatarlarni aniqlash va baholash Uslubiyoti» kabi 15 dan ortiq ichki idoraviy hujjatlar qabul qilinib, mazkur hujjatlardagi tartib-taomillar  amaliyotga joriy  etilayotgani qayd etildi.

O‘zbekiston Respublikasining «Manfaatlar to‘qnashuvi to‘g‘risida»gi Qonuni ijrosini ta'minlash maqsadida, joriy yilda 102 nafar xodim tomonidan manfaatlar to‘qnashuvi to‘g‘risidagi deklaratsiyalar to‘ldirildi. Mazkur deklaratsiyalar tahlil qilinganda 13 nafar xodimda ehtimoliy manfaatlar to‘qnashuvi aniqlanib, mazkur holatlarni qonuniy tarzda bartaraf etish ishlari amalga oshirildi.  Shu bilan birga, Inspeksiya faoliyatidagi korrupsiyaviy xavf xatarlar aniqlanib, ularni baholash ishlari amalga oshirildi, natijada korrupsiyaviy xavf-xatarlari yuqori bo‘lgan 25 ta, o‘rta xavfga ega o‘lgan 15 ta va korrupsion omillari past bo‘lgan 20 ta funksiya baholanib, ularni minimallashtirish va bartaraf etish ishlari amalga oshirildi. Hisobot davrida  Korrupsiyaga qarshi murosasiz kurashish muhitini yaratish, xodimlarning huquqiy ongi va savodxonligini oshirish maqsadida  14 ta seminar va profilaktik tadbirlar o‘tkazildi.

Bundan tashqari, hisobot davrida Inspeksiyaning jami 58 nafar xodimi pora olish va berish bilan kurashish menejmenti ISO 37001:2016 xalqaro standarti talablari bo‘yicha  o‘qitilib, tegishli sertifikatlarni oldi. Shuningdek, ISO 37001:2016 xalqaro standarti bo‘yicha audit va konsalting  ishlari muvaafaqqiyatli amalga oshirilib, joriy yilda Inspeksiya tomonidan mazkur  xalqaro sertifikat qo‘lga kiritildi.

Shuningdek, O‘zbekiston Respublikasi Prezidenti va Vazirlar Mahkamasining korrupsiyaga va yashirin iqtisodiyotga qarshi kurashish borasidagi topshiriqlari ijrosini ta'minlash maqsadida, 13 ta viloyatda joyiga chiqqan holda Inspeksiyaning hududiy boshqarmalari faoliyatini o‘rganish ishlari amalga oshirildi.

Xizmat tekshiruvlari jarayonida olingan birlamchi ma'lumotlarga ko‘ra, Inspeksiya xodimlari tomonidan o‘tkazilgan nazorat tadbirlari davomida ular tomonidan tegishli choralar ko‘rilmaganligi, xizmat vazifalarini lozim darajada bajarmaganliklari, mansab vakolatlarini suiste'mol qilishlari oqibatida jami  102,1 mlrd.so‘mlik foydali qazilmalarning  noqonuniy qazib olinganligi holatlari to‘liq o‘rganilmasdan yashirilganligi, dalolatnomalarda rasmiylashtirilmagani aniqlandi.

Xususan:

6 ta tadbirkorlik sub'ekti tomonidan yetkazilgan zarar tog‘ jinslari bilan to‘ldirish orqali qoplangan deb topilib, soxta xulosalar berilishi natijasida 12,2 mlrd so‘mlik zarar amalda qoplanmagani;

77 ta xo‘jalik yurituvchi sub'ekt tomonidan foydali qazilmalarni noqonuniy qazib olishlari natijasida Inspeksiyaning tekshirish dalolatnomalarida aks ettirilmagan 3,1 mln.kub metr hajm aniqlanib,  89,9 mlrd so‘m yetkazilgan zarar hisoblandi.

Xizmat tekshiruvlari xulosasiga ko‘ra:

hududiy boshqarmalarning 8 nafar xodimi bilan tuzilgan mehnat shartnomalari bekor qilindi, 41 nafar xodimga nisbatan turli intizomiy jazo qo‘llanildi. To‘plangan hujjatlar qonuniy chora ko‘rish uchun O‘zbekiston Respublikasi Bosh prokuraturasiga yuborildi.

Natijada prokuratura organlari tomonidan:

16 ta tadbirkorlik sub'ekti tomonidan  jamiyat va davlat manfaatlariga katta - 26,8 mlrd.so‘m  miqdorda zarar yetkazilgani aniqlanib, ularga nisbatan O‘zbekiston Respublikasi Jinoyat kodeksining 184-moddasi 3-qismi, 229-moddasi 3-qismi, 196-moddasi 3-qismi “a” bandlari asosida jinoyat ishlari qo‘zg‘atilib, tergov harakatlari olib borilmoqda.

Shuningdek, Inspeksiyaning 7 nafar mas'ul mansabdor xodimiga nisbatan Jinoyat kodeksining 205-moddasi 2-qismi “a” bandi, 207-moddasi 1-qismi, 209-moddasi 2-qismi “a” bandi bo‘yicha jinoyat ishlari qo‘zg‘atilib, tergov harkatlari olib borilmoqda.

Shu bilan birga, 2024 yilda Farg‘ona va Qashqadaryo viloyatlarida 29 ta xo‘jalik yurituvchi sub'ektda o‘tkazilgan nazorat tadbirlari bo‘yicha turli huquq-tartibot idoralari tomonidan O‘zbekiston Respublikasi JPKning 83-84-moddalari bilan jinoyat ishi qo‘zg‘atishdan rad qilinganligi aniqlandi.

Bugungi kunda, Inspeksiyaning Korrupsiyaga qarshi kurashish bo‘limi tomonidan  vakolatli organlar bilan hamkorlikda 8 ta tadbirkorlik sub'ektiga nisbatan 34,7 mlrd so‘mlik (865,3 ming kub m) yetkazilgan zarar bo‘yicha qaytadan jinoyat ishlari qo‘zg‘atilib, tergov harakatlari olib borilmoqda.

Bundan tashqari, ichki xizmat tekshiruvi davomida Buxoro viloyati Shofirkon tumanidagi “Quljuqtau”, Navoiy viloyati Konimex tumanidagi “Taushan” tog‘ massivlarida “Oltin Kon” MChJga tegishli hududlarda bir guruh shaxslar tomonidan hudud o‘zboshimchalik bilan egallab olinib, noqonuniy oltin qazib olayotganlik holatlari aniqlandi.

Ushbu holatlar yuzasidan to‘plangan materiallar O‘zbekiston Respublikasi Davlat xavfsizlik xizmatiga  taqdim etildi.

Tog‘-kon sanoati va geologiya sohasini nazorat qilish inspeksiyasi, DXX, shuningdek, Buxoro va Navoiy viloyat Ichki ishlar boshqarmalari hamkorligida “Quljuqtau” massivida noqonuniy faoliyatni to‘xtatish bo‘yicha tezkor tadbirlar o‘tkazildi. Natijada hududda noqonuniy oltin qazib olayotgan 37 nafar shaxs qo‘lga olinib, davlat va jamiyat manfaatlariga yetkazilgan 20 mlrd.so‘m zarar aniqlandi.

Holat yuzasidan Jinoyat kodeksining 196-modda 2-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.