Tog‘-kon sanoati va geologiya sohasini nazorat qilish inspeksiyasining axboroti eshitildi
2025-11-12 18:35:00 / Yangiliklar
Ta’kidlanganidek, 2025-yilda inspeksiya tomonidan yer qa’ridan noqonuniy foydalanish, yer osti suvlari nazorati yo‘nalishlarida bir qancha nazorat tadbirlari amalga oshirilgan. Ular davomida jismoniy va yuridik shaxslarga tegishli yozma ko‘rsatmalar berilgan. Ayrim korxonalarning ish faoliyati to‘xtatib turilgan bo‘lsa, huquqbuzarlik sodir etgan bir qator subyektlar ma’muriy javobgarlikka tortilgan.
Joriy yilda yer qa’ridan foydalanishda videotasvir orqali qayd etilgan huquqbuzarliklarni ko‘rib chiqish, yer qa’ridan foydalanish sohasida huquqbuzarliklar qayd etilgan videoyozuvlarni yuborgan shaxslarni rag‘batlantirish tartibini belgilovchi nizom tasdiqlangani sohada jamoatchilik nazoratini kuchaytirib, huquqbuzarliklarni sezilarli kamaytirishda muhim ahamiyat kasb etdi.
Bugungi kunda inspeksiya tomonidan sohani raqamlashtirish bo‘yicha jadal harakatlar olib borilmoqda. “Geomonitoring” axborot tizimi ishlab chiqilib, yashirin iqtisodiyotning oldini olish uchun axborot tizimida noruda foydali qazilmalar bo‘yicha ma’lumotlar bazasi raqamlashtirildi. Axborot tizimi bir qancha tegishli davlat organlari tizimlari bilan integratsiya qilindi.
Munozaralar davomida deputatlar o‘tgan davrda amalga oshirilgan ishlarni e’tirof etib, sohada ayrim masalalar borligini qayd etdilar. Xususan, noqonuniy qazib olish holatlari hanuz yuqori ekanligi, bu borada nazorat tadbirlarini kuchaytirish lozimligi ta’kidlandi.
Deputatlar sohani raqamlashtirish ishlarini jadallashtirib, inson omilini kamaytirish, tadbirkorlik subyektlari uchun shaffof va soddalashtirilgan tartib-taomillarni ta’minlash, tog‘-kon sanoati korxonalarida sodir bo‘lgan baxtsiz hodisalar sabablarini tahlil qilib, ularning oldini olish lozimligini aytib o‘tdilar.
Shuningdek, inspeksiya tomonidan o‘tkazilgan ichki xizmat tekshiruvlari natijalaridan kelib chiqib, korrupsiyaning oldini olish va xodimlarning mas’uliyatini oshirish bo‘yicha qo‘shimcha choralar ko‘rish muhimligi qayd etildi.
Muhokamalar chog‘ida noqonuniy qazib olishga qarshi choralarni kuchaytirish, huquqbuzarliklarga qarshi samarali kurashish, inspeksiya tomonidan ko‘rsatiladigan davlat xizmatlarini raqamlashtirish va onlayn shaklda ko‘rsatish, sohada kadrlar sonini ko‘paytirish bo‘yicha bir qator takliflar berildi.
Yakunda kun tartibidagi masala yuzasidan qo‘mitaning tegishli qarori qabul qilindi.