Kasbiy taʼlim agentligi

Toshkent shahrida ikki davlat hukumatlari ishtirokida o‘tkazilayotgan “INNOPROM. Markaziy Osiyo” xalqaro sanoat ko‘rgazmasi doirasida muhim kelishuvga erishildi. O‘zbekiston va Rossiya Federatsiyasi hukumatlararo hamkorlik aloqalarini mustahkamlash maqsadida Buxoro viloyati Kasbiy ta’limni boshqarmasi hamda Rossiyaning nufuzli Ufa davlat neft texnika universiteti o‘rtasida o‘zaro anglashuv memorandumi imzolandi.

Mazkur hujjat doirasida tomonlar quyidagi ustuvor vazifalar bo‘yicha kelishuvga erishdilar:

Qisqa muddatli o‘quv kurslari: 2026-yilning may-iyun oylaridan boshlab "KIP va avtomatika" (o‘lchov nazorat asboblari va boshqaruv), "Burg‘ilash ishlari" hamda "Payvandlash" yo‘nalishlari bo‘yicha yuqori texnologik o‘quv kurslari yo‘lga qo‘yiladi.

Kadrlar eksporti va bandlik: Kurs bitiruvchilariga xalqaro namunadagi sertifikatlar topshirilib, ular nafaqat O‘zbekiston hududida, balki Rossiya Federatsiyasining yirik neftni qayta ishlash sanoati korxonalarida munosib ish o‘rinlariga yo‘naltiriladi.

Ijtimoiy qamrov: Mazkur ta’lim dasturlariga nafaqat tizimdagi texnikum o‘quvchilari, balki viloyatdagi ishsiz fuqarolar ham jalb etilib, ularning kasbiy malakasini oshirish va bandligini ta’minlash choralari ko‘riladi.

Rus tili va malaka oshirish: O‘quv jarayonida mutaxassislarga texnik rus tili chuqurlashtirilgan holda o‘rgatiladi.

Muzokaralar jarayonida Boshqirdiston Respublikasi Bosh vaziri o‘rinbosari hamda Buxoro viloyati Kasbiy ta’lim boshqarmasi boshlig‘i Azamat Naimov ishtirok etib, ushbu hamkorlik ikki davlat o‘rtasidagi ta’lim va sanoat integratsiyasini yangi bosqichga olib chiqishini ta’kidladilar.

Ushbu kelishuv Buxoro viloyatida xalqaro standartlarga mos keladigan malakali kadrlar tayyorlash tizimini yanada takomillashtirishga xizmat qiladi.