“O‘zbekiston–Qatar” Do‘stlik jamiyati tashkil etildi: xalq diplomatiyasida yangi bosqich
2025-10-29 13:50:00 / Yangiliklar
Ushbu jamiyat O‘zbekiston va Qatar o‘rtasidagi xalq diplomatiyasi va madaniy muloqotni yangi bosqichga olib chiqadi. “Bu jamiyat xalqlarimiz o‘rtasidagi do‘stlik va o‘zaro ishonchni mustahkamlashga xizmat qiladi”, — dedi qo‘mita raisi K. Sariyev o‘z nutqida.
Xalq diplomatiyasida muhim institut
Bugungi kunda O‘zbekistonda 43 ta do‘stlik jamiyati faoliyat yuritmoqda. Ularning faoliyati xorijiy mamlakatlar bilan madaniy, ijtimoiy va iqtisodiy hamkorlikni yo‘lga qo‘yishda “xalq diplomatiyasi ko‘prigi” sifatida katta ahamiyatga ega.
So‘nggi yillarda ushbu jamiyatlar tomonidan 180 dan ortiq xalqaro tadbirlar, jumladan, ko‘rgazmalar, anjumanlar, konsertlar, sport musobaqalari va ilmiy uchrashuvlar tashkil etilgan. Ularning faoliyati 200 dan ziyod OAVda keng yoritilgan.
Masalan, “O‘zbekiston–Vyetnam” do‘stlik jamiyati tashabbusi bilan Xo Shi Minning “Mahbusning kundaligi” asari ilk bor o‘zbek tiliga tarjima qilinib, nashr etilgan. “O‘zbekiston–Germaniya” jamiyati esa 2024-yilda nemis tili yo‘nalishidagi talabalar o‘rtasida eng yaxshi taqdimot tanlovini o‘tkazdi.
O‘zbekiston–Qatar aloqalari izchil rivojlanmoqda
O‘zbekiston va Qatar o‘rtasidagi hamkorlik so‘nggi yillarda sezilarli faollashdi. 2024-yilda ikki davlat o‘rtasidagi savdo aylanmasi 7,7 million AQSh dollarini tashkil etgan bo‘lib, eksport tarkibida oziq-ovqat mahsulotlari va xizmatlar, importda esa kimyo va yoqilg‘i mahsulotlari ustunlik qilgan.
Shu bilan birga, ikki mamlakatda madaniyat haftaliklari, dizayn biyeannalelari, hunarmandchilik va turizm ko‘rgazmalari o‘tkazilib kelinmoqda. 2024-yil oktyabr oyida Toshkentda “Qatar madaniyati haftaligi” bo‘lib o‘tgan, unda Qatarning madaniyat vaziri shayx Abdurahmon Ol Soniy ishtirok etgan.
Ravshan Irmatov — jamiyatning birinchi raisi
Tadbir davomida “O‘zbekiston–Qatar” Do‘stlik jamiyatining raisi etib Ravshan Irmatov tayinlangani e’lon qilindi.
Kahramon Sariyev bu tayinlovni “xalqaro miqyosda O‘zbekistonning ijobiy imijini ifoda etayotgan, fаol fuqarolik pozitsiyasiga ega inson” sifatida e’tirof etdi.
“Ishonchim komilki, Ravshan Sаyfidinovich rahbarligida jamiyat madaniyat, sport, turizm va ta’lim sohalarida yangi tashabbuslarni hayotga tatbiq etadi”, — dedi qo‘mita raisi.
Tadbir yakunida qatarlik hamkorlarga minnatdorlik izhor qilinib, yangi jamiyatning tashkil etilishi ikki xalq o‘rtasidagi do‘stlik va hamjihatlik rishtalarini mustahkamlashda muhim bosqich bo‘lishi ta’kidlandi.