“Taraqqiyot nuqtasi” munozara klubida millatlararo totuvlik va imkoniyatlar muhokama qilindi
2025-09-12 09:30:00 / Yangiliklar
INNO Innovatsion o‘quv va ishlab chiqarish texnoparkida “Taraqqiyot nuqtasi” munozara klubining navbatdagi soni bo‘lib o‘tdi. Ushbu son “Bir bo‘lsak – yagona xalqmiz, birlashsak – Vatanmiz!” shiori ostida o‘tkazilib, unda yurtimizda istiqomat qilayotgan 130 dan ortiq millat va elat vakillariga yaratilgan sharoitlar hamda keng imkoniyatlar masalasi muhokama etildi.
Mazkur loyiha O‘zLiDeP Markaziy kengashi tashabbusi bo‘lib, unda turli ijtimoiy-siyosiy mavzular yuzasidan ochiq muloqot va fikr almashuvlar tashkil etib kelinmoqda. Bu safargi ko‘rsatuvda O‘zbekiston Respublikasi Millatlararo munosabatlar va xorijdagi vatandoshlar masalalari bo‘yicha qo‘mitasi raisi o‘rinbosari Bekzod Shukurov, Koreys milliy madaniy markazi raisi, Oliy Majlis Qonunchilik palatasi deputati Viktor Pak, Respublika rus madaniy markazi rahbari Sergey Mironov, O‘zbekiston qozoq milliy madaniy markazi raisi Serikbay Usenov ishtirok etdi.
Milliy madaniy markazlar faoliyati kengaymoqda
Bugungi kunda mamlakatimizda 157 ta milliy madaniy markaz faoliyat ko‘rsatmoqda. 2021-yildan buyon mazkur markazlar uchun davlat tomonidan subsidiyalar ajratilib kelinmoqda. So‘nggi to‘rt yil davomida respublika darajasidagi 14 ta markazga qariyb 5,5 milliard so‘m mablag‘ yo‘naltirildi. Joriy, ya’ni 2025-yilda esa Qoraqalpog‘iston Respublikasi, viloyat va tumanlardagi markazlarga 6,6 milliard so‘m subsidiya ajratilishi rejalashtirilgan.
Shuningdek, milliy madaniy markazlarga “Do‘stlik uylari” va Qo‘mita binosida mutlaqo bepul faoliyat yuritishlari uchun qulay sharoitlar yaratilgan. Toshkent shahrida barpo etilgan Milliy madaniy markazlar pavilonida esa 22 ta millatga xos do‘stlik uylari qurildi. Mazkur pavilonning 2025-yil 29-iyul kuni o‘tkazilgan ochilish marosimi tarixiy voqea sifatida baholanib, turli millat va elatlarning madaniyatini saqlash va rivojlantirish yo‘lida muhim qadamlardan biri sifatida e’tirof etildi.
Millatlararo totuvlik – taraqqiyot garovi
Munozara davomida ishtirokchilar mamlakatimizda millatlararo totuvlik, o‘zaro hurmat va hamjihatlik tamoyillariga asoslangan davlat siyosati haqida fikr bildirishdi. Ularning ta’kidlashicha, yaratilayotgan sharoitlar nafaqat madaniyatlarni asrab-avaylash, balki millatlararo do‘stlik va birdamlikni mustahkamlashga xizmat qilmoqda.
“Taraqqiyot nuqtasi”ning bu galgi soni mamlakatimizda milliy qadriyatlarni asrash, turli xalqlarning o‘ziga xos madaniyatini rivojlantirish, shu orqali umumiy taraqqiyot va barqarorlikni ta’minlash yo‘lidagi sa’y-harakatlarga bag‘ishlandi.