O‘zbekiston Respublikasi Millatlararo munosabatlar va xorijdagi vatandoshlar masalalari bo‘yicha qo‘mitasi

Tadbirning asosiy maqsadi — tatar tiliga qiziqishni oshirish, to‘g‘ri nutq va yozuv ko‘nikmalarini mustahkamlash, milliy tilning adabiy normalari bilan tanishtirish hamda yosh avlodda ona tiliga hurmatni kuchaytirishdir. Aksiyada ishtirok etganlar orfografiya va grammatika bo‘yicha bilimini sinovdan o‘tkazish imkoniga ega bo‘ldi.

Rus uyida o‘tgan diktantda turli yoshdagi 100 dan ortiq kishi qatnashdi. Ular orasida faxriylar, yoshlar, talabalar, o‘qituvchilar, shuningdek, tatar tilini mustaqil o‘rganayotgan fuqarolar ham bor. Ko‘plab ishtirokchilar uchun mazkur tadbir o‘z milliy ildizlarini eslash va tilni saqlashga hissa qo‘shishning muhim usuliga aylandi.

Tashkilotchilar ta’kidlashicha, bu yilgi “Tatarcha diktant” nafaqat savodxonlik sinovi, balki xalqlar o‘rtasidagi do‘stlik va madaniy hamkorlikni mustahkamlashga qaratilgan katta ma’rifiy tashabbus sifatida ham e’tirof etiladi. Tashkentda o‘tkazilishi esa O‘zbekistonda turli millatlarning madaniy merosini qo‘llab-quvvatlashga doimiy e’tibor borligini yana bir bor ko‘rsatdi.

Mutaxassislarning fikriga ko‘ra, bunday aksiyalar tatar tilining mintaqadagi nufuzini mustahkamlash, yoshlar orasida o‘rganishga qiziqishni oshirish va madaniy rang-baranglikni saqlashda muhim rol o‘ynaydi. Tadbir yakunida ishtirokchilarga sertifikatlar topshirildi va kelgusi yillarda aksiyaning yana kengayishi rejalashtirilgani bildirildi.