Aholi bandligi dolzarb vazifamiz
2025-04-01 16:00:00 / Yangiliklar
Bugungi kunda Gʻallaorol tumanida 190,6 ming nafar aholi isteqomat qilmoqda. Mehnat resurslari soni 93,9 ming nafarni, iqtisodiy faol aholi 70,0 ming nafarni, xalq xo‘jaligining turli sohalarida band bo‘lgan aholi soni 65,8 ming nafarni, shundan rasmiy sektorda 32,5 ming nafarni, norasmiy sektorni 28,3 ming nafarni tashkil qiladi. Xorijga ishga ketganlar 5,0 ming kishini tashkil etdi.
Ishga joylashtirishga muhtoj, ish bilan band bo‘lmagan aholi (ishsizlar) 4,2 ming kishini yoki ishsizlik darajasi 6,0 foizni tashkil etdi. Bundan tashqari mehnat bozoriga ilk bor kirib keluvchilar, jumladan ta’lim muassasalari bitiruvchilari, harbiy xizmatdan zaxiraga bo‘shatilgan shaxslar va mehnat migratsiyasidan qaytgan shaxslar bandligini ta’minlash davlat siyosatining eng dolzarb masalalardan biri hisoblanadi.
Shu maqsadda O‘zbekiston Respublikasi Prezidentining 2025 yil 17 yanvardagi “2025 yilda aholi bandligini ta’minlash va kambag‘allikni qisqartirish chora-tadbirlari to‘g‘risida”gi PQ-12-sonli qarori hamda Xalq deputatlari Gʻallaorol tumani Kengashining 2025 yil 10-fevraldagi VII-4-17-3-45-K/25-sonli qarori qabul qilindi.
Ushbu qaror doirasida tumanda 17 370 nafar aholining bandligini ta’minlash nazarda tutilgan.
Joriy yilning yanvar-mart oylarida 3 342 nafar aholining bandligini ta’minlash rejalashtirilgan bo‘lib, amalda 5 404 nafar aholining bandligi ta’minlanib, dastur ijrosi 162 %ga bajarildi.
Aholini bandligini ta’minlashga ko‘maklashish bo‘yicha tumanda 2025 yil yanvar-mart oyida Kambag‘allikni qisqartirish va bandlikka ko‘maklashish bo‘limi tomonidan 640 nafar ishsiz fuqarolar bo‘lim yo‘llanmasi bilan ishga joylashtirildi.
Tumanda joriy yilda 5 ta bo‘sh ish o‘rinlari yarmakasi o‘tkazildi. Yarmarkaga 45 ta korxona va tashkilotlar 178 ta bo‘sh ish o‘rinlari bilan qatnashdi. Yarmarkaga 78 nafar fuqarolar jalb qilinib, ularning 50 nafari bo‘lim yo‘llanmasi orqali ishga joylashtirildi, 8 nafari kasb tayyorgarligiga yuborildi, 20 nafariga huquqiy maslahatlar berildi.
Gʻallaorol tumanida joriy yilning yanvar-mart oylarida ishsiz fuqarolar bandligini ta’minlash maqsadida tumandagi mahalla maskani, kasb-hunar maktablari, xususiy va oilaviy korxonalarda hamda hunarmandchilik yo‘nalishida jami 355 nafar ishsiz fuqarolar qaytadan kasb-hunarga va tadbirkorlik yo‘nalishida o‘qishga jalb qilindi, jumladan 16 nafari nogironlarni tashkil qiladi.
Tumanda joriy yilda «kompaniya — kooperativ — dehqon xo‘jaligi» tamoyili asosida 3 ta ishlab chiqarish kooperativlari tashkil etildi.
Oilaviy tadbirkorlikni rivojlantirish dasturlari doirasida yagona elektron platforma orqali 2025 yil uchun 24,1 mlrd.so‘m kredit mablag‘lari ajratish bo‘yicha yillik rejasi belgilangan bo‘lib, joriy yilning yanvar-mart oylarida 711 nafar aholi hamda tadbirkorlik sub’yektlariga 9,7 mlrd.so‘mlik imtiyozli kredit mablag‘lari ajratilib, birinchi chorak rejasi 132% bajarildi. Natijada 1058 nafar aholining bandligi ta’minlandi.
Gʻallaorol tumani hokimining
moliya-iqtisodiyot va kambag‘allikni
qisqartirish bo‘yicha birinchi o‘rinbosari T.Qo‘chqorov