Jizzax viloyati G’allaorol tumani hokimligi

2024-yil 6-dekabrda kuchga kirgan O‘zbekiston Respublikasining “Manfaatlar to‘qnashuvi to‘g‘risida”gi qonun davlat va jamiyat uchun muhim ahamiyatga ega bo‘lib, uning qabul qilinishi ochiqlik va shaffoflikni ta‘minlash, shuningdek, korrupsiya kabi salbiy holatlarni bartaraf etishda sezilarli o‘rin egallaydi.

Manfaatlar to‘qnashuvi deganda shaxsning lavozim majburiyatlarini lozim darajada bajarishiga ta‘sir ko‘rsatishi mumkin bo‘lgan vaziyat tushiniladi.

Mazkur qonun manfaatlar to‘qnashuvini tartibga solish, unga oid munosabatlarni aniqlash, manfaatlar to‘qnashuvi haqida axborotni oshkor qilish va bartaraf etish bo‘yicha chora tadbirlarni belgilaydi.

          Shuningdek, qonun davlat tashkilotlaridagi xodimlarning huquq va majburiyatlarini aniq tartibga soladi.

O‘zbekiston Respublikasining Ma‘muriy javobgarlik to‘g‘risidagi kodeksining 193⁴-moddasida davlat fuqarolik xizmati xodimlarining manfaatlar toʻqnashuvi toʻgʻrisidagi qonunchilik talablarini buzganligi uchun javobgarlik belgilangan:

Davlat organining yoki boshqa tashkilotning mansabdor shaxsi yoki xodimi tomonidan manfaatlar toʻqnashuvi toʻgʻrisidagi qonunchilikda nazarda tutilgan manfaatlar toʻqnashuvi mavjudligi haqida xabar bermaslik,
— bazaviy hisoblash miqdorining uch baravaridan besh baravarigacha miqdorda jarima solishga sabab boʻladi.

Xuddi shunday huquqbuzarlik maʼmuriy jazo chorasi qoʻllanilganidan keyin bir yil davomida takroran sodir etilgan boʻlsa,
— bazaviy hisoblash miqdorining besh baravaridan oʻn baravarigacha miqdorda jarima solishga sabab boʻladi.

Davlat organining yoki boshqa tashkilotning mansabdor shaxsiga maʼlum boʻlib qolgan, manfaatlar toʻqnashuvi toʻgʻrisidagi qonunchilikda nazarda tutilgan mavjud yoki ehtimoliy manfaatlar toʻqnashuvini tartibga solish yuzasidan choralar koʻrmaslik,

— bazaviy hisoblash miqdorining besh baravaridan oʻn baravarigacha miqdorda jarima solishga sabab boʻladi.

Ushbu moddaning uchinchi qismida nazarda tutilgan huquqbuzarlik maʼmuriy jazo chorasi qoʻllanilganidan keyin bir yil davomida takroran sodir etilganboʻlsa,

— bazaviy hisoblash miqdorining oʻn baravaridan oʻn besh baravarigacha miqdorda jarima solishga sabab boʻladi.

Ushbu moddaning birinchi va uchinchi qismlarida nazarda tutilgan huquqbuzarliklar davlat xaridlari sohasida sodir etilgan boʻlsa,
— mansabdor shaxslarga bazaviy hisoblash miqdorining yigirma baravaridan oʻttiz baravarigacha miqdorda jarima solishga sabab boʻladi.

Yuqoridagilar ko‘ra, xodim ishga qabul qilishdagi yoki yillik deklaratsiyasida manfaatlar toʻqnashuvi yoki ehtimoliy manfaatlar to‘qnashuvi mavjudligi haqidagi ma‘lumotlarni ko‘rsatishi, ish faoliyati davomida yuzaga kelsa bildirgi orqali rahbariga xabar berishi shart.

Viloyat hokimligi Korrupsiyaga qarshi ichki nazorat shu‘basi