Boshqarma haqida
Boshqarma haqida
Navoiy viloyati Favqulodda vaziyatlar boshqarmasi — aholi hayoti va sog‘lig‘ini, hududlar, korxonalar hamda atrof-muhitni tabiiy va texnogen xususiyatli favqulodda vaziyatlardan muhofaza qilish, ularning oldini olish hamda oqibatlarini bartaraf etish sohasida faoliyat yurituvchi maxsus davlat boshqaruvi organi hisoblanadi.
Boshqarma o‘z faoliyatini O‘zbekiston Respublikasi Konstitutsiyasi, O‘zbekiston Respublikasi qonunlari, Prezident farmon va qarorlari, Vazirlar Mahkamasining qarorlari hamda Favqulodda vaziyatlar vazirligining tegishli normativ-huquqiy hujjatlari asosida amalga oshiradi. Jumladan, O‘zbekiston Respublikasi Vazirlar Mahkamasining “O‘zbekiston Respublikasi Favqulodda vaziyatlar vazirligining faoliyatini tashkil etish masalalari to‘g‘risida”gi qarori asosida hududiy favqulodda vaziyatlar boshqarmalari faoliyati tashkil etilgan.
Boshqarmaning asosiy vazifalari quyidagilardan iborat:
- favqulodda vaziyatlarning oldini olish bo‘yicha profilaktik tadbirlarni tashkil etish;
- aholi va hududlarni favqulodda vaziyatlardan muhofaza qilish;
- yong‘in xavfsizligini ta’minlash hamda yong‘inlarning oldini olish;
- qutqaruv va kechiktirib bo‘lmaydigan avariya-tiklash ishlarini amalga oshirish;
- fuqarolar muhofazasi tadbirlarini tashkil etish;
- tabiiy ofatlar, texnogen avariyalar va boshqa favqulodda holatlarda tezkor harakat qilish;
- aholini favqulodda vaziyatlarda to‘g‘ri harakat qilishga tayyorlash va targ‘ibot ishlarini olib borish;
- hamkor tashkilotlar bilan birgalikda maxsus-taktik o‘quv mashqlari va amaliy mashg‘ulotlarni tashkil etish.
Boshqarma tizimida zamonaviy texnika va maxsus qutqaruv vositalari bilan ta’minlangan qutqaruv hamda yong‘in-qutqaruv bo‘linmalari faoliyat yuritadi. Shuningdek, boshqarma tomonidan viloyat hududida yuzaga kelishi mumkin bo‘lgan favqulodda vaziyatlarni monitoring qilish, xavf-xatarlarni baholash va tezkor choralar ko‘rish ishlari doimiy ravishda olib boriladi.
Bugungi kunda Navoiy viloyati Favqulodda vaziyatlar boshqarmasi tomonidan aholi xavfsizligini ta’minlash, favqulodda vaziyatlarning oldini olish, fuqarolar muhofazasi tizimini yanada takomillashtirish hamda zamonaviy qutqaruv xizmatlarini rivojlantirish borasida keng ko‘lamli ishlar amalga oshirilmoqda.