Sement sanoatini dekarbonizatsiya qilish bo‘yicha Germaniya tajribasi o‘rganildi
2026-10-19 09:30:00 / Yangiliklar
Birlashgan Millatlar Tashkiloti Taraqqiyot Dasturining (BMTTD) O‘zbekistondagi vakolatxonasi tashabbusi va ko‘magida O‘zbekiston delegatsiyasining Germaniya Federativ Respublikasiga xizmat safari tashkil etildi.
Tashrif “Sement sanoatini dekarbonizatsiya qilish: O‘zbekistonda issiqxona gazlari chiqindilarini kamaytirish va amaliy chora-tadbirlarni jadallashtirish” loyihasi doirasida tashkil etilib, unda tegishli davlat tashkilotlari vakillari bilan bir qatorda, Vazirlar Mahkamasi huzuridagi Energiya samaradorligi milliy agentligi mutaxassisi ham ishtirok etdi.
Safar davomida delegatsiya Germaniyaning sement sanoatida energiya samaradorligini oshirish, ishlab chiqarish jarayonlarida zamonaviy texnologiyalarni qo‘llash, issiqxona gazlari chiqindilarini kamaytirish hamda sohani tartibga solishga qaratilgan normativ-huquqiy yondashuvlari bilan tanishdi.
Mazkur tashrif sanoat tarmoqlarida energiya samaradorligini oshirish, zamonaviy texnologiyalarni tatbiq etish va ekologik barqaror ishlab chiqarishni rivojlantirishga qaratilgan xalqaro hamkorlikni mustahkamlashga xizmat qiladi. Germaniya tajribasini milliy sharoitga moslashtirish esa O‘zbekistonda sement sanoatini bosqichma-bosqich dekarbonizatsiya qilish bo‘yicha amaliy chora-tadbirlarni ishlab chiqish va amalga oshirish uchun muhim asos bo‘lishi mumkin.