Issiqxonalarda energiya samaradorligini oshirish bo‘yicha amaliy ishlar boshlandi
2026-10-20 10:30:00 / Yangiliklar
O‘zbekiston Respublikasi Prezidentining 2026-yil 13-oktabrdagi “Ilg‘or “yashil” texnologiyalar asosida issiqxona xo‘jaliklarini rivojlantirish va aholi tomorqa yer maydonlaridan samarali foydalanish bo‘yicha qo‘shimcha chora-tadbirlar to‘g‘risida”gi PQ-371-son qarori ijrosi doirasida Energiya samaradorligi milliy agentligi tomonidan amaliy ishlar boshlandi.
Qarorga muvofiq, 2030-yil 1-yanvarga qadar Toshkent viloyatining Toshkent, Zangiota, Qibray, Yangiyo‘l va Yuqori Chirchiq tumanlarida aholi tomorqalaridagi issiqxonalar uchun quyosh panellari, issiqlik nasoslari, infraqizil isitish moslamalari va boshqa energiya samarador uskunalarni xarid qilish hamda o‘rnatish xarajatlarining 40 foizi miqdorida, biroq 100 million so‘mdan oshmagan miqdorda bir martalik subsidiya ajratiladi. Bunda quyosh panellari uchun subsidiya boshqa energiya samarador isitish uskunalari bilan birgalikda o‘rnatilgan taqdirda beriladi.
Uskunalarni xarid qilish va o‘rnatish Energiya samaradorligini oshirish raqamli platformasi — esma.uzex.uz orqali amalga oshiriladi.
Energiya samaradorligi milliy agentligi mutaxassislari belgilangan tumanlardagi issiqxonalarga tashrif buyurib, issiqxona egalari va uskunalar ta’minotchilari uchun amaliy seminarlar tashkil etmoqda.
Seminarlarda issiqxona egalariga subsidiya olish shartlari, ariza topshirish tartibi va raqamli platformadan foydalanish bo‘yicha tushuntirishlar berilmoqda. Ta’minotchilarga esa platformada ro‘yxatdan o‘tish, uskunalarni yetkazib berish va o‘rnatish xizmatlarini tashkil etish tartibi tushuntirilmoqda.
Bugungi kunda raqamli platformada issiqlik nasoslarini o‘rnatish xizmatlarini ko‘rsatuvchi 50 dan ortiq ta’minotchi ro‘yxatdan o‘tgan. Bu issiqxona egalari uchun xizmat ko‘rsatuvchilarni tanlash va energiya samarador texnologiyalarni joriy etish imkoniyatlarini kengaytiradi.
Qarorda ijtimoiy himoyaga muhtoj oilalarni qo‘llab-quvvatlash choralari ham belgilangan. 2026-yil 1-dekabrga qadar mazkur beshta tumandagi issiqxonachilikka ixtisoslashgan 50 ta mahallada “mahalla yettiligi” tavsiyasi asosida Ijtimoiy reyestrga kiritilgan bittadan oilaning xonadoniga maydoni kamida 4 sotix bo‘lgan, issiqlikni saqlovchi maxsus qoplama va energiya samarador isitish vositalari bilan jihozlangan issiqxona tashkil etish uchun har biriga 200 million so‘mgacha subsidiya ajratish nazarda tutilgan.
Shuningdek, Ijtimoiy himoya milliy agentligi Energiya samaradorligi milliy agentligi bilan hamkorlikda ushbu 50 ta xonadonning devor va tomlarini izolyatsiya qilish, energiya samarador deraza va eshiklar hamda geliokollektorlar bilan jihozlash ishlarini tashkil etadi.
Mazkur chora-tadbirlar issiqxonalarda energiya sarfini kamaytirish, zamonaviy energiya samarador texnologiyalarni keng joriy etish, aholi tomorqalaridan samarali foydalanish hamda ijtimoiy himoyaga muhtoj oilalarning daromad topish imkoniyatlarini kengaytirishga xizmat qiladi.