O‘zbekiston va Slovakiya o‘rtasida ESCO sohasidagi hamkorlik mustahkamlanmoqda
2026-09-23 17:25:00 / Yangiliklar
O‘zbekistonda energiya servis kompaniyalari — ESCO bozorini rivojlantirish hamda energiya samaradorligi sohasida O‘zbekiston va Slovakiya o‘rtasidagi hamkorlikni mustahkamlashga bag‘ishlangan seminar bo‘lib o‘tdi.
Tadbirda xalqaro va Yevropa tajribasi asosida energiya auditi va ESCO bozorini rivojlantirishga qaratilgan loyiha doirasida ishlab chiqilgan hujjatlar taqdim etildi.
Xususan, ESCO kompaniyalarini sertifikatlash va energiya auditini o‘tkazish bo‘yicha yo‘riqnoma, bazaviy ko‘rsatkichlarni baholash va verifikatsiya qilish tartib-taomillari, namunaviy energiya samaradorligi shartnomasi (EPC) hamda ESCO loyihalari uchun moliyaviy-iqtisodiy modellar va risklarni kamaytirish mexanizmlari ishlab chiqildi.
Seminarda energiya auditorlarini sertifikatlash, energiya auditlari sifatini oshirish, ESCO shartnomalarini standartlashtirish va loyihalarni moliyalashtirish mexanizmlari muhokama qilindi.
Tadbir doirasida Energiya samaradorligi milliy agentligi va Slovakiya Innovatsiyalar va energetika agentligi (SIEA) o‘rtasida o‘zaro anglashuv memorandumi imzolandi.
Shuningdek, loyiha doirasida O‘zbekistonda shakllangan ilk xususiy ESCO kompaniyasining tajribasi va biznes modeli taqdim etildi.