Chortoqda energiya samarador maktabgacha ta’lim tashkiloti foydalanishga topshirildi
2026-08-26 17:05:00 / Yangiliklar
O‘zbekiston Respublikasi Vazirlar Mahkamasining 2025-yil 7-maydagi 300-son qarori asosida mukammal ta’mirlangan Chortoq tumani “Dildosh” MFY hududida joylashgan 23-sonli maktabgacha ta’lim tashkiloti foydalanishga topshirildi.
360 o‘ringa mo‘ljallangan maktabgacha ta’lim tashkilotining isitish va sovitish tizimlari energiya samaradorligi yuqori bo‘lgan issiqlik nasoslari bilan jihozlandi, quyosh panellari, geliokollektorlar hamda fankoyllar o‘rnatildi.
Shuningdek, qo‘shimcha isitish tizimi sifatida “issiq pol” texnologiyasi joriy etildi. Bino poydevori, tashqi devorlari va tom qismi issiqlik izolyatsiyasi bilan qoplandi, ventilyatsiyalanadigan fasad tizimi o‘rnatildi.
Amalga oshirilgan energiya samaradorlik choralari natijasida binoda energiya resurslaridan oqilona foydalanish, issiqlik yo‘qotishlarini kamaytirish va energiya sarfini maqbullashtirish uchun zarur sharoitlar yaratildi.
Zamonaviy isitish va sovitish tizimlari, qayta tiklanuvchi energiya manbalari hamda issiqlik izolyatsiyasi yechimlari muassasaning energiya samaradorligini oshirishga xizmat qiladi. Eng muhimi, tarbiyalanuvchilar uchun qulay mikroiqlim va zamonaviy ta’lim-tarbiya muhiti ta’minlanadi.