Jizzax viloyatida energiya samaradorligi loyihalari amalga oshiriladigan ijtimoiy soha obyektlari o‘rganildi
2026-08-15 17:20:00 / Yangiliklar
O‘zbekiston Respublikasi Vazirlar Mahkamasining 277-sonli “2026–2027-yillarda hududlardagi ijtimoiy soha muassasalarida energiya samaradorligi loyihalari ko‘lamini kengaytirish chora-tadbirlari to‘g‘risida”gi qaroriga muvofiq, Jizzax viloyatida energiya samaradorligi loyihalari amalga oshiriladigan ijtimoiy soha muassasalarining manzilli ro‘yxati asosida o‘rganish ishlari olib borildi.
Energiya samaradorligi milliy agentligi rahbariyati boshchiligida olib borilgan o‘rganishlar davomida ijtimoiy soha obyektlarining mavjud holati, muhandislik va isitish tizimlari, shuningdek, energiya samaradorligini oshirish imkoniyatlari ko‘rib chiqildi.
Shuningdek, Paxtakor tumanining “Buyuk ipak yo‘li” QFY hududidagi 104 ta ko‘p qavatli xonadonni energiya samarador uskunalar bilan jihozlash imkoniyatlari o‘rganildi. Mazkur xonadonlarni issiqlik ta’minoti tizimiga ulash uchun mavjud infratuzilma va texnik imkoniyatlar tahlil qilinib, zarur chora-tadbirlar yuzasidan takliflar ishlab chiqilmoqda.
Bunday loyihalar hududlarda energiya samaradorligini oshirish, energiya resurslaridan oqilona foydalanish, issiqlik yo‘qotishlarini kamaytirish hamda aholi va ijtimoiy soha obyektlarining sifatli issiqlik ta’minotini yaxshilashga xizmat qiladi.