Özbekiston Respublikasi Vazirlar Mahkamasi huzuridagi Energiya samaradorligi milliy agentligi

Oʻzbekiston Respublikasi Vazirlar Mahkamasi huzuridagi Energiya samaradorligi milliy agentligi tomonidan 2026-yil birinchi yarim yilligida amalga oshirilgan ishlar, erishilgan natijalar hamda joriy loyihalar haqida maʼlumotlarni e'tiboringizga taqdim etamiz.

Umuman olganda, respublikamizda energiya samaradorligini oshirish boʻyicha keng koʻlamli islohotlar amalga oshirildi, xususan, 125 mingga yaqin energiya tejamkor kvartiralar barpo etildi, 934 ming m² dan ortiq koʻp kvartirali uylarda issiqlik izolyatsiyasi ishlari bajarildi, 5,2mingta davlat maktabgacha taʼlim tashkilotiga 13 mingta geliokollektor oʻrnatildi, 4,7 mingta ijtimoiy muassasada eski isitish tizimlari energiya samarador uskunalarga almashtirildi. Shu bilan birga, 550 dan ortiq energiya auditori sertifikatlanib, mamlakatda energiya samaradorligi sohasining malakali kadrlar bazasi yaratildi.

Ushbu davrda Energiya samaradorligini oshirish raqamli platformasi – esma.uzex.uz orqali aholi tomonidan subsidiya asosida energiya samarador qurilmalarni xarid qilish va oʻrnatish boʻyicha kelib tushgan soʻrovlar asosida 7,3 mingta xonadonda energiya auditi oʻtkazildi. Energiya audit natijalariga koʻra, 5,7 mingdan ortiq xonadonga quyosh panellari, geliokollektorlar hamda issiqlik nasoslari oʻrnatish uchun 42,4 mlrd soʻmdan ortiq subsidiya ajratildi.

Joriy yilda strategik ahamiyatga ega yana bir muhim natija sifatida mamlakatda ilk bor “Nol energiya sarfli binolar” konsepsiyasi va ijtimoiy obyektlar uchun energiya samaradorligi boʻyicha minimal talablar tasdiqlandi, energiya tejamkor qurilishning huquqiy asoslari shakllantirildi.

JICA, Osiyo taraqqiyot banki, Jahon banki,  va boshqa xalqaro moliya institutlari bilan umumiy qiymati 820 mln AQSH dollariga teng imtiyozli loyihalar protfeli shakllantirilgan.

Bugungi kunda, Agentlik tomonidan joriy yilda iqtisod qilinishi rejalashtirilgan energiya resurslari maqsadli koʻrsatkichlarning raqamli monitoringi yoʻlga qoʻyilgan. Oʻzbekiston Respublikasi Prezidentining PF–70-son “2026-yilda energiya samaradorligini yanada oshirish, energiya resurslarini tejash va ulardan oqilona foydalanishning qoʻshimcha chora-tadbirlari toʻgʻrisida”gi Prezident Farmoniga koʻra, 2026-yil uchun energiya resurslarini iqtisod qilish boʻyicha belgilangan maqsadli koʻrsatkichlarning ijrosi elektr energiyasi boʻyicha 2,6 mlrd kVt/soatga, tabiiy gaz boʻyicha 974 mln/metr kubga bajarildi.

Bunda, amalga oshirilgan energiya samaradorligi tadbirlari hisobidan:

yakka tartibdagi va koʻp kvartirali uylar, ijtimoiy soha obyektlari hamda xoʻjalik yurituvchi subyektlarda 2,1 mlrd kVt/soat elektr energiyasi va 594,1 mln metr kub tabiiy gaz;

25 ta yirik tarmoq korxonalarida 486 mln kVt/soat elektr energiyasi va 104,9 mln metr kub tabiiy gaz;

yirik quyosh va shamol elektr stansiyalarini ishga tushirish hisobidan 276 mln metr kub tabiiy gaz iqtisod qilishga erishildi.

Hisobot davrida Oʻzbekiston Respublikasi Prezidentining 60 ta hujjati orqali 295 ta topshiriq nazoratga olingan va ijrosi oʻz vaqtida bajarilishi taʼminlanmoqda. Oʻzbekiston Respublikasi Vazirlar Mahkamasining 318 ta topshirigʻi nazoratga olingan.

Joriy yilning iyul oyiga qadar ijrosi taʼminlanishi lozim boʻlgan jami 55 ta Prezident topshiriqlarining 48 tasi (87 foiz) muddatdan oldin bajarilgan xamda 7 ta topshiriq ijrosi yuzasidan tegishli ishlar amalga oshirilmoqda. Koʻrib chiqilayotgan davrda jami 72 ta Vazirlar Mahkamasi topshiriqlarining 67 tasi (93 foiz) bajarilgan hamda 5 ta topshiriq ijrosi yuzasidan tegishli ishlar amalga oshirilmoqda. 

Energiya samaradorligi milliy agentligi tomonidan korrupsiyaviy holatlarning oldini olish, ochiqlik va shaffoflikni taʼminlash maqsadida anonim murojaatlar uchun Telegram tarmogʻida maxsus bot ishga tushirildi. Mazkur botga murojaat qiluvchining shaxsi va taqdim etilgan maʼlumotlarning maxfiyligi kafolatlanadi.

Korrupsiyaviy xavf-xatar yuqori boʻlgan davlat xizmati lavozimlarida faoliyat koʻrsatuvchi xodimlar uchun “Korrupsiyaviy xavf-xatarlarni bartaraf etish” mavzusidagi 36 soatlik masofaviy maxsus chuqurlashtirilgan oʻquv kursida 10 nafar xodim, Davlat xizmatiga ishga qabul qilingan xodimlar uchun “Davlat xizmatida korrupsiyaga qarshi kurashish” mavzusidagi oʻquv kursida 10 nafar xodimlar qatnashib, yuqori natijalar bilan tamomladi.