“Energiya tejamkorlik” raqamli platformasi bilan ishlash masalalariga bag‘ishlangan videoselektor yig‘ilishi o‘tkazildi
2026-07-16 21:05:00 / Yangiliklar
O‘zbekiston Respublikasi Vazirlar Mahkamasining 2026-yil 14-maydagi 242-son qarori ijrosini ta’minlash maqsadida Energiya samaradorligi milliy agentligi hamda Bosh prokuratura hamkorlikda “Energiya tejamkorlik” raqamli platformasi bilan ishlash masalalariga bag‘ishlangan videoselektor yig‘ilishi tashkil etildi.
Videoselektor yig‘ilishida Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, prokuratura organlari, tuman va shahar hokimliklari, ijtimoiy soha muassasalari, yirik sanoat korxonalari, shuningdek, “Hududiy elektr tarmoqlari” AJning hududiy filiallari hamda elektr ta’minoti korxonalarining mas’ul rahbar va mutaxassislari ishtirok etdi.
Yig‘ilish davomida ishtirokchilarga “Energiya tejamkorlik” raqamli platformasida ishlash tartibi, energiya tejash bo‘yicha maqsadli ko‘rsatkichlarni shakllantirish va platformaga kiritish, hisobotlarni yuritish, shuningdek, hududlar kesimida energiya samaradorligi ko‘rsatkichlarini monitoring qilish va baholash mexanizmlari yuzasidan batafsil tushuntirishlar berildi.
Shuningdek, platformaga kiritilayotgan ma’lumotlarning to‘liqligi, ishonchliligi va o‘z vaqtida taqdim etilishi energiya samaradorligi bo‘yicha belgilangan vazifalarning samarali ijrosini ta’minlashda muhim ahamiyat kasb etishi alohida ta’kidlandi.
Videoselektor yakunida ishtirokchilarning platformadan foydalanish bilan bog‘liq savollariga Energiya samaradorligi milliy agentligi mutaxassislari tomonidan batafsil javoblar berilib, amaliy tavsiyalar hamda qo‘shimcha ko‘rsatmalar taqdim etildi.