O'zbekiston Respublikasi Vazirlar Mahkamasi huzuridagi Energiya samaradorligi milliy agentligi

Oʻzbekiston Respublikasi Vazirlar Mahkamasining "2026–2027-yillarda hududlardagi ijtimoiy soha muassasalarida energiya samaradorligi loyihalari ko‘lamini kengaytirish chora-tadbirlari to‘g‘risida"gi 277-son qarori ijrosini samarali ta'minlash maqsadida amaliy seminar tashkil etildi.

Energiya samaradorligi milliy agentligi boshchiligida o‘tgan seminarda mazkur qaror asosida energiya samaradorligi tadbirlari amalga oshiriladigan ijtimoiy soha muassasalari uchun biriktirilgan loyiha tashkilotlari mutaxassislari, mahalliy hokimlik hamda tegishli vazirlik va idoralar vakillari ishtirok etdilar.

Seminarning asosiy maqsadi loyihalash ishlarini yagona texnik talablar asosida tashkil etish, zamonaviy energiya samarador texnologiyalarni keng joriy etish hamda qurilish-montaj ishlarining samarali va sifatli bajarilishini ta'minlash yuzasidan mutaxassislarning bilim va amaliy ko‘nikmalarini mustahkamlashdan iborat bo‘ldi.

Tadbir davomida ijtimoiy soha muassasalarida energiya samaradorligini oshirishga qaratilgan kompleks chora-tadbirlar, jumladan:

• bino fasadlari va tom qismlarini issiqlik izolyatsiyasi bilan ta'minlash;
• energiya samarador eshik va derazalarni o‘rnatish;
• zamonaviy isitish va sovitish tizimlarini joriy etish;
• issiqlik nasoslari, geliokollektorlar hamda fotoelektr stansiyalaridan samarali foydalanish;
• LED yoritish tizimlari va avtomatlashtirilgan boshqaruv texnologiyalarini qo‘llash masalalari batafsil ko‘rib chiqildi.

Shuningdek, loyiha hujjatlarini ishlab chiqishda qo‘llaniladigan texnik me'yorlar, energiya samaradorlik ko‘rsatkichlari hamda qurilish ishlari sifatini ta'minlashga oid talablar yuzasidan amaliy tavsiyalar berildi.

Seminar savol-javoblarga boy tarzda o‘tdi. Ishtirokchilar ish jarayonida yuzaga kelayotgan amaliy masalalar bo‘yicha o‘zlarini qiziqtirgan savollarga Energiya samaradorligi milliy agentligi mutaxassislaridan batafsil javob oldilar.