Angor va Denov tumanlarida energiya samaradorligini oshirish masalalariga bag‘ishlangan seminarlar o‘tkazildi
2026-07-05 10:45:00 / Yangiliklar
Energiya samaradorligi milliy agentligi tomonidan Surxandaryo viloyatining Angor va Denov tumanlarida aholi, tadbirkorlik subyektlari hamda mas’ul tashkilotlar vakillari ishtirokida energiya samaradorligini oshirish va energiya tejamkor texnologiyalarni keng joriy etishga bag‘ishlangan seminarlar tashkil etildi.
Mazkur seminarlar energiya resurslaridan oqilona foydalanish, zamonaviy energiya samarador texnologiyalarni amaliyotga keng tatbiq etish hamda davlat tomonidan yaratilayotgan qo‘llab-quvvatlash mexanizmlari yuzasidan tushuntirish ishlarini olib borish maqsadida o‘tkazildi.
Tadbirlar davomida Agentlik mutaxassislari tomonidan quyosh panellari, geliokollektorlar, issiqlik nasoslari va boshqa energiya samarador uskunalarning afzalliklari, ularni o‘rnatish orqali elektr va tabiiy gaz iste’molini kamaytirish imkoniyatlari haqida batafsil ma’lumot berildi.
Shuningdek, energiya samarador texnologiyalarni xarid qilish va o‘rnatish uchun ajratilayotgan subsidiya hamda kompensatsiya mexanizmlari, arizalarni elektron platforma orqali rasmiylashtirish tartibi, mavjud imtiyozlardan foydalanish shartlari bo‘yicha amaliy tushuntirishlar berildi.
Seminarlar ochiq muloqot shaklida tashkil etilib, ishtirokchilarni qiziqtirgan savollarga Agentlik mutaxassislari tomonidan batafsil javoblar taqdim etildi.