O'zbekiston Respublikasi Vazirlar Mahkamasi huzuridagi Energiya samaradorligi milliy agentligi

Andijon viloyati Oltinko‘l tumanida aholi xonadonlarida energiya samaradorligini oshirish, energiya resurslaridan oqilona foydalanish, qayta tiklanuvchi energiya manbalarini keng joriy etish hamda ajratilayotgan subsidiya va kompensatsiyalardan samarali foydalanish masalalariga bag‘ishlangan seminar tashkil etildi.

Tadbirda tuman hokimiyati vakillari, hokim yordamchilari, Energiya samaradorligi milliy agentligi mas’ullari, tadbirkorlik subyektlari, yoshlar va faol fuqarolar ishtirok etdi.

Seminar davomida aholi xonadonlarida energiya tejamkor texnologiyalarni joriy etish, zamonaviy qurilmalar orqali energiya sarfini kamaytirish hamda “yashil iqtisodiyot” tamoyillarini hayotga keng tatbiq etish bo‘yicha batafsil tushuntirishlar berildi.

Xususan, O‘zbekiston Respublikasi Vazirlar Mahkamasining 673-sonli “Energiya servis xizmatlari bozorini shakllantirish hamda aholi uy-joylarining energiya samaradorligi oshirilishini ragʻbatlantirish chora-tadbirlari toʻgʻrisida”gi qarori mazmun-mohiyati ishtirokchilarga keng tushuntirildi. Mazkur qarorga muvofiq aholi uy-joylarini energiya auditidan o‘tkazish xarajatlarini qoplash, quyosh panellari, geliokollektorlar, issiqlik nasoslari, energiya samarador isitish qozonlari va boshqa zamonaviy uskunalarni xarid qilish hamda o‘rnatish xarajatlarining bir qismini qoplash uchun subsidiya va kompensatsiyalar ajratilishi ta’kidlandi.

Shuningdek, “yashil ta’mir” va “yashil” iste’mol kreditlari bo‘yicha foiz xarajatlarining bir qismini qoplash mexanizmlari ham seminar ishtirokchilariga tushuntirildi.

Tadbirda O‘zbekiston Respublikasi Prezidentining PF–70-sonli Farmoni hamda Vazirlar Mahkamasining 242-sonli qarori doirasida 2026-yilda iqtisodiyot tarmoqlarida energiya samaradorligini oshirish, elektr energiyasi va tabiiy gazni tejash bo‘yicha belgilangan vazifalar yuzasidan ham ma’lumotlar berildi.

Mutaxassislar tomonidan energiya samaradorligini oshirishga qaratilgan loyihalarni amalga oshirish, qayta tiklanuvchi energiya manbalaridan samarali foydalanish, tadbirkorlar uchun yaratilayotgan imkoniyatlar, kredit va subsidiya mexanizmlari hamda soliq imtiyozlari haqida atroflicha tushuntirishlar berildi.

Alohida ta’kidlanganidek, subsidiya va kompensatsiyalarni ajratish jarayonida shaffoflikni ta’minlash hamda korrupsiyaviy xavflarning oldini olish maqsadida Energiya samaradorligini oshirish raqamli platformasi — esma.uzex.uz orqali barcha jarayonlar elektron shaklda amalga oshiriladi.

Seminar yakunida tadbirkorlar va fuqarolar tomonidan kredit ajratish tartiblari, subsidiya olish shartlari, energiya tejovchi qurilmalarning samaradorligi va amaliy mexanizmlar yuzasidan berilgan savollarga mutaxassislar tomonidan batafsil javoblar berildi. Energiya resurslaridan oqilona foydalanish, energiya tejamkor texnologiyalarni keng joriy etish va aholi hamda tadbirkorlik subyektlarining ushbu jarayonlardagi faolligini oshirish bo‘yicha tavsiyalar bildirildi.