Energiya samaradorligi milliy agentligi vakillari Osiyo toza energiya forumida ishtirok etdi
2026-06-12 12:40:00 / Yangiliklar
Energiya samaradorligi milliy agentligi xodimlari Filippinning Manila shahrida o‘tkazilgan Osiyo toza energiya forumi-2026 (ACEF) doirasidagi tadbirlarda faol ishtirok etdilar. Mazkur xalqaro forum doirasida Agentlik vakillari ishtirokida toza energetikaga o‘tish, energiya samaradorligini oshirish va zamonaviy energetika yechimlarini joriy etish bo‘yicha ilg‘or tajriba almashinuvi tashkil etildi.
Osiyo toza energiya forumi-2026 Osiyo taraqqiyot bankining (OTB) 60 yillik faoliyati doirasida o‘tkazilayotgan nufuzli xalqaro tadbirlardan biri bo‘lib, Osiyo va Tinch okeani mintaqasida toza, xavfsiz va barqaror energiya tizimlarini rivojlantirish masalalariga bag‘ishlangan.
Forum OTBning 2025-yilda yangilangan Energetika siyosati asosida tashkil etilib, mintaqada energiya xavfsizligini ta’minlash, qayta tiklanuvchi energiya manbalarini rivojlantirish, energiya samaradorligini oshirish hamda innovatsion texnologiyalarni keng joriy etishga qaratilgan.
Tadbirda hukumatlar, xalqaro tashkilotlar, moliya institutlari, xususiy sektor vakillari, ilmiy doiralar va rivojlanish hamkorlari ishtirok etib, energetika sohasidagi dolzarb masalalar va yangi imkoniyatlarni muhokama qilindi.
Forumning asosiy yo‘nalishlari qatorida energiya xavfsizligini mustahkamlash, energetika infratuzilmasining barqarorligini oshirish, aholining energiya resurslaridan foydalanish imkoniyatlarini kengaytirish hamda raqamli texnologiyalar asosida aqlli energetika tizimlarini rivojlantirish masalalari alohida o‘rin tutadi.
Energiya samaradorligi milliy agentligi vakillarining ushbu forumdagi ishtiroki O‘zbekistonning energiya samaradorligi, energiya tejamkor texnologiyalarni joriy etish va yashil energetikani rivojlantirish borasidagi xalqaro hamkorligini mustahkamlashga xizmat qiladi.