Prezident Farmoni: energiya samaradorligini oshirishga qaratilgan tizimli choralar belgilandi
2026-04-30 09:05:00 / Yangiliklar
Oʻzbekiston Respublikasi Prezidentining 2026-yil 29-apreldagi PF–70-son Farmoniga muvofiq, 2026-yilda energiya samaradorligini yanada oshirish, energiya resurslarini tejash va ulardan oqilona foydalanish boʻyicha qoʻshimcha chora-tadbirlar belgilandi.
Farmonga koʻra, 2026-yilda jami 4,3 mlrd kVt/soat elektr energiyasi va 2,8 mlrd kub metr tabiiy gazni tejash maqsad qilingan. Bu koʻrsatkichlarga uy-joy fondi, ijtimoiy soha obyektlari va xoʻjalik subyektlarida energiya samaradorligini oshirish, qayta tiklanuvchi energiya manbalarini keng joriy etish hamda yirik sanoat korxonalarida tejamkorlik choralarini amalga oshirish hisobiga erishiladi.
2026-yil 1-iyuldan davlat sektoridagi yangi va rekonstruksiya qilinadigan binolar uchun energiya samaradorligining kamida “C” toifasi joriy etiladi. Bunda energiya tejash isteʼmolchilarni tarmoqdan uzish yoki cheklash orqali emas, balki zamonaviy texnologiyalarni joriy etish hisobiga taʼminlanadi.
Farmonga muvofiq, energiya servis kompaniyalari (ESKO) orqali davlat obyektlarida energiya samaradorligi loyihalarini amalga oshirish mexanizmi kengaytirilib, ular uchun kafolatlangan toʻlov tizimi joriy etildi. Shuningdek, energiya sarfi yuqori boʻlgan obyektlarda xalqaro standartlar asosida kompleks modernizatsiya ishlari amalga oshiriladi.
2026-yildan boshlab energiya isteʼmolini raqamli monitoring qilish, jumladan Big Data, biznes tahlil va sunʼiy intellekt texnologiyalari orqali tahlil qilish tizimi yoʻlga qoʻyiladi. Shu bilan birga, binolar uchun energiya samaradorligining etalon koʻrsatkichlari (Benchmark) joriy etiladi.
Hududlarda energiya samaradorligi loyihalarini jadallashtirish, koʻp kvartirali uylarni modernizatsiya qilish, “yashil” qurilish standartlarini joriy etish hamda energiya tejamkor uskunalardan keng foydalanish boʻyicha aniq vazifalar belgilandi.
Shuningdek, taʼlim tizimida energiya tejamkorlik madaniyatini shakllantirish, aholi oʻrtasida “Energiya samaradorligi – farovon hayot garovi” umummilliy harakatini amalga oshirish nazarda tutilgan.