Energiya samaradorligi milliy agentligi Intelligent Building Expo Tashkent xalqaro koʻrgazmasi hamkori
2026-03-12 16:30:00 / Yangiliklar
2026-yilning 20–22 may kunlari Toshkent shahridagi “Oʻzekspomarkaz” majmuasida Intelligent Building Expo Tashkent (IBE) — aqlli binolar, muhandislik tizimlari va barqaror shahar infratuzilmasiga bagʻishlangan xalqaro ixtisoslashtirilgan koʻrgazma boʻlib oʻtadi.
Energiya samaradorligi milliy agentligi Intelligent Building Expo Tashkent xalqaro koʻrgazmasining hamkori sifatida ishtirok etadi. Agentlikning mazkur koʻrgazmadagi ishtiroki mamlakatda energiya samaradorligini oshirish, zamonaviy texnologiyalarni joriy etish va barqaror shahar infratuzilmasini rivojlantirishga qaratilgan tashabbuslarni yanada kengaytirishga xizmat qiladi.
Markaziy Osiyoda “aqlli” va barqaror shahar muhitini rivojlantirishga xizmat qiladigan innovatsion texnologiyalarni taqdim etish, sohadagi ilgʻor tajribalar almashinuvi uchun samarali muloqot maydonini yaratish va ishbilarmonlik aloqalarini mustahkamlashga qaratilgan koʻrgazma doirasida energiya samaradorligi, avtomatlashtirish, raqamli xavfsizlik, muhandislik tizimlari hamda barqaror suv taʼminoti kabi muhim yoʻnalishlardagi ilgʻor texnologik yechimlar namoyish etiladi.
Xususan, binolarning muhandislik tizimlari va infratuzilmasini rivojlantirishga qaratilgan qator zamonaviy yechimlar – isitish va ventilyatsiya tizimlari, suv taʼminoti va suv chiqarish infratuzilmasi, issiqlik nasoslari, qozonlar va suv isitgichlar, konditsionerlar, havo quritgich va namlagichlar kabi texnologiyalar, shuningdek, isitish va sovitish tizimlarida qayta tiklanuvchi energiya manbalaridan foydalanish, issiqlik taʼminotida energiya sarfini kamaytirishga qaratilgan innovatsion ishlanmalar namoyish etiladi.
Yoritish va binolarni avtomatlashtirish yoʻnalishi doirasida arxitekturaviy, interyer va koʻcha yoritish tizimlari, LED va OLED texnologiyalari, energiya samarador yoritish yechimlari, raqamli loyihalash texnologiyalari, shuningdek, aqlli elektr tarmoqlari (smart grids), elektromobillar uchun zaryadlash stansiyalari, qayta tiklanuvchi energiya manbalarini integratsiya qilish va energiyani saqlash texnologiyalari namoyish etiladi.