Xorazm viloyatida energiya samaradorligini oshirish imkoniyatlari muhokama qilindi
2026-03-04 17:00:00 / Yangiliklar
Energiya samaradorligi milliy agentligi mutaxassislari tomonidan Xorazm viloyatining Bogʻot, Xazorasp va Tuproqqalʼa tumanlari, shuningdek Urganch shahri va Urganch tumani hokim yordamchilari ishtirokida seminar tashkil etildi. Tadbirda kambag‘allikni qisqartirish, xususan, aholi bandligini taʼminlash, kambagʻallikni qisqartirish, fuqarolarning daromad manbalarini kengaytirish hamda ularni tadbirkorlik faoliyatiga jalb etish masalalari muhokama qilindi.
Shuningdek, Energiya samaradorligi milliy agentligi vakillari tomonidan energiya resurslaridan oqilona foydalanish, energiya samarador texnologiyalarni joriy etish hamda aholi va tadbirkorlik subyektlari oʻrtasida energiya isteʼmoli madaniyatini oshirish masalalariga ham alohida eʼtibor qaratildi.
Xususan, aholi xonadonlarida energiya samarador tizimlarni joriy etishni qo‘llab-quvvatlash maqsadida davlat tomonidan berilayotgan imtiyoz va subsidiyalar haqida ma’lumot berildi. Jumladan, aholi turar joylarida energiya auditini o‘tkazish xarajatlari to‘liq qoplab berilishi, quyosh panellari va geliokollektorlar qiymatining 20 foizi subsidiya sifatida ajratilishi, issiqlik nasoslari xarajatlarining 40 foizigacha davlat tomonidan qoplanishi hamda “Yashil ta’mir” kreditlari bo‘yicha foiz stavkasining 19 foizdan ortiq qismi subsidiya qilinishi ta’kidlandi.
Seminar davomida xonadonlarni energiya samarador texnologiyalar bilan jihozlashning afzalliklari, xususan, energiya resurslaridan samarali foydalanish, xarajatlarni kamaytirish va uy-joylarning energiya samaradorligini oshirish imkoniyatlari amaliy misollar orqali yoritib berildi. Olib borilayotgan islohotlarni samarali tashkil etish, amaliy natijadorlikni oshirish hamda aholi bilan manzilli ishlash mexanizmlarini takomillashtirish bo‘yicha tavsiyalar berildi.