Dolzarbligi

Keyingi yillarda mamlakatimizda atrof-muhitni muhofaza qilish, ekologik xavfsizlikni taʼminlash, tabiiy resurslardan oqilona foydalanish va ekologik vaziyatni yaxshilash boʻyicha tizimli ishlar olib borilmoqda. 

Biroq qurilish va urbanizatsiya koʻlamlarining kengayishi, qurilish maydonlarida chang va qum zarrachalarining havoga koʻtarilishi hollarining ortishi atmosfera havosi sifatining yomonlashuviga olib kelmoqda. Bu esa, oʻz navbatida, qurilish maydonlarida atmosfera havosini muhofaza qilish talablarini buzganlik uchun qurilish tashkilotlari mansabdor shaxslarining javobgarligini belgilash zaruriyatini yuzaga keltirmoqda.

Javobgarlik belgilanmoqda

Qonun loyihasi bilan Ma’muriy javobgarlik to‘g‘risidagi kodeksga qurilish maydonlarida atmosfera havosini muhofaza qilish talablariga rioya qilmaganlik uchun javobgarlikni belgilovchi qo‘shimchalar va o‘zgartirish kiritilmoqda.

Xususan, MJtK 85(1)-modda (“Qurilish maydonlarida atmosfera havosini muhofaza qilish talablariga rioya qilmaslik”) bilan toʻldirilmoqda. Unga ko‘ra, oʻlchami besh yuz kvadrat metr va undan ortiq boʻlgan qurilish maydonida, unga tutash boʻlgan hududlarda hamda undan chiqish yoʻllarida chang va qum zarrachalarining havoga koʻtarilishini bartaraf etishga doir majburiy talablarni buzish yoxud ushbu hududlarda ifloslantiruvchi moddalarning yoʻl qoʻyiladigan doiradagi normativlardan ortiq darajada atmosfera havosiga chiqarilishiga yoʻl qoʻyish mansabdor shaxslarga BHMning 10 baravari miqdorida jarima solishga sabab boʻladi.

Xuddi shunday huquqbuzarlik maʼmuriy jazo chorasi qoʻllanilganidan keyin bir yil davomida takror sodir etilsa, mansabdor shaxslarga BHMning 50 baravari miqdorida jarima solinadi.

Ushbu Qonun ekologik vaziyatning yaxshilanishiga, atmosfera havosi ifloslanishining oldini olishga, shuningdek, qurilish tashkilotlari mansabdor shaxslarining atrof-muhitni muhofaza qilish borasidagi masʼuliyatini oshirishga xizmat qiladi.

Qonun loyihasi Oliy Majlis Qonunchilik palatasi tomonidan ma’qullandi.