Katta qum sichqoni eng katta kemiruvchi bo'lib, tanasining uzunligi 150-200 mm.ga yetadi. O't o'simliklari va buta shoxlari bilan oziqlanadi. Kuzda saksovul shoxlari, tuya tikanlari va sho‘r o‘simliklarning katta zaxiralarini to‘plab, maxsus omborxonasiga yashirib qo‘yadi.

Ta'kidlash joizki, ayni damda respublikamizdagi barcha muhofaza etiladigan tabiiy hududlarda jonivorlarning qishdan eson-omon chiqishi, ozuqa topishini osonlashtirish uchun biotexnik tadbirlar o‘tkazilmoqda. Xususan, "Oqtog‘-Tomdi" davlat qo‘riqxonasi hududlarida ham beda, xashaklar va omuxta yem mahsulotlari qo‘yib chiqilmoqda.

Ma’lumot uchun, “Oqtog‘-Tomdi” davlat qo‘riqxonasi 2022-yil fevral oyida Navoiy viloyatining Tomdi tumanida tashkil etilgan. Qo‘riqxonada sut emizuvchilarning 14 turi, qushlarning 22 turi va sudralib yuruvchilarning 7 turi yashaydi. Shulardan 16 turdagi hayvonlar O‘zbekiston Qizil kitobiga kiritilgan.