Muayyan hududda yovvoyi hayvonlarni ovlash uchun tasdiqlangan kvotalar bo‘yicha ovchilik guvohnomasi va Ekologiya, atrof-muhitni muhofaza qilish va iqlim o‘zgarishi vazirligi tomonidan berilgan ruxsatnomaga ega bo‘lgan shaxslargagina ov qilishga ruxsat etiladi.

Yodda tuting! Tabiiy erkinlik holatida yashovchi yovvoyi hayvonlar davlat mulki hisoblanadi. Ularni yetishtirish uchun kvota O‘zbekiston Respublikasi Fanlar akademiyasi xulosasi asosida yovvoyi hayvonlarning soni va hisobga olinganligi to‘g‘risidagi ma’lumotlarga muvofiq Ekologiya vazirligi tomonidan belgilanadi.

Sizga ovchining huquq va majburiyatlari haqida eslatib o'tamiz.

Ovchi quyidagi huquqlarga ega:

— ruxsat etilgan yovvoyi hayvonlar turlarini belgilangan joylarda va belgilangan muddatlarda ovlash;

— olingan ov mahsulotlarini o‘z xohishiga ko‘ra tasarruf etish;

— ovchilik, atrof-muhit va tabiiy resurslarni muhofaza qilish qoidalariga rioya etilishi ustidan davlat nazoratini amalga oshiruvchi organlarning mansabdor shaxslaridan ularning shaxsini tasdiqlovchi hujjatlarni talab qilish.

Shuningdek, ovchining quyidagi majburiyatlari bor:

— ov qilish chog‘ida ovchilik guvohnomasini, ov qurolini saqlash va olib yurishga doir ruxsatnomani, yovvoyi hayvonlarni tutishga doir ruxsatnomani yoki ovchilik yo‘llanmasini (yovvoyi hayvonlarni tutish kartochkasini) yonida olib yurish;

— ovchilik xo‘jaligining va ov qilishga ruxsat etiladigan hududning chegaralarini aniq bilish;

— ov qilishga ruxsat etiladigan hududdan tashqarida ov qilmaslik;

— yovvoyi hayvonlarni tutish normalariga va ov qilish muddatlariga rioya etish, ov qilishni yovvoyi hayvonlarni tutishga doir ruxsatnomada ko‘rsatilgan joylarda amalga oshirish;

— ov qilishni boshlash oldidan ovchilik yo‘llanmasida (yovvoyi hayvonlarni tutish kartochkasida) ov qilish boshlangan sana to‘g‘risidagi ustunni to‘ldirish;

— ov tugagach, ovchilik xo‘jaligidan yoki ov qilish joylaridan chiqib ketishdan oldin yovvoyi hayvonlarni tutishga doir ruxsatnomada tutilgan yovvoyi hayvonlar haqida belgilar qo‘yish;

— ov tugagach, ovchilik yo‘llanmasini (yovvoyi hayvonlarni tutish kartochkasini) ov natijalari to‘g‘risida belgi qo‘yilgan holda, o‘n kundan kechiktirmay qaytarish;

— yong‘in xavfsizligi talablariga rioya etish;

— maishiy chiqindilarni to‘xtash joyidan yig‘ishtirib olish va to‘plash joylariga olib chiqish;

— halqalar, mikrochiplar, yorliqchalar, tamg‘alari bo‘lgan yovvoyi hayvonlar tutilganda hududida ov qilish amalga oshirilgan ovchilik xo‘jaligiga yoki ekologiya va atrof-muhitni muhofaza qilish hududiy organiga ular to‘g‘risida axborot taqdim etish;

— lavhalar, e’lonlar, oxurlar, yoyib qo‘yilgan qo‘shimcha ozuqalar, sun’iy uyalarga va boshqa biotexnik qurilmalarga shikast yetkazmaslik;

— ov qilishning xavfsizlik qoidalarini bilish va ularga amal qilish.

Ov mavsumida haftasiga ikki kun – seshanba va chorshanba kunlari O‘zbekiston Respublikasining butun hududida qushlarni ovlash taqiqlanadi (Fanlar akademiyasi xulosasini inobatga olgan holda, Ekologiya, atrof-muhitni muhofaza qilish va iqlim o‘zgarishi vazirligi tomonidan beriladigan ilmiy, tibbiy va ilmiy-tibbiy ruxsatnomalar bundan mustasno).

Ov qilish qoidalarini buzish O‘zbekiston Respublikasi qonun hujjatlariga muvofiq qat’iy javobgarlikka sabab bo‘ladi. Ushbu qoidalarni buzgan shaxslar ma'muriy yoki jinoiy javobgarlikka tortilishi mumkin.