Tadbir Ekologiya, atrof-muhitni muhofaza qilish va iqlim oʻzgarishi vazirligi, Bojxona qoʻmitasi, TRAFFIC yovvoyi tabiat savdosi monitoringi global tarmogʻi, Fanlar akademiyasi Zoologiya instituti, Qozogʻiston bioxilma-xillikni saqlash assotsiatsiyasi, “EKOMAKTAB” ekologik resurs markazi va boshqa tashkilotlar ko‘magida “Fauna & Flora International” xalqaro tashkilotining “Markaziy Osiyoda yovvoyi tabiatga oid jinoyatlarga qarshi kurashish salohiyatini kuchaytirish va ko‘maklashish” loyihasi doirasida bojxona kinologlari uchun tashkil etildi. 

Ma’lumot uchun, loyihadan ko‘zlangan maqsad havo, temir yo‘l va boshqa transport turlarida hayvonlarni noqonuniy olib kirish yoki olib chiqishning oldini olishdan iborat. Loyiha 1973-yilda Vashingtonda qabul qilingan yoʻqolib ketish xavfi ostida turgan yovvoyi fauna va flora turlarining xalqaro savdosi toʻgʻrisidagi konvensiya (CITES)ga asoslanadi.

"Seminar viloyatda yovvoyi hayvonlarning noqonuniy savdosiga qarshi kurashishda tegishli yo‘nalish bo‘yicha xizmat itlarini o‘qitishning ahamiyati va samaradorligini oshirish, markaz faoliyati bilan tanishish, o‘quv qo‘llanmalari va adabiyotlar, xizmat itlarini o‘rgatish usullari bilan tanishtirish, shuningdek, kinologlarning bilim va ko‘nikmalarini o‘rganish va baholashga bag‘ishlangan”, — dedi Ekologiya vazirligi bo‘lim boshlig‘i Abdurashid Sodiqov.

Ikki kun davomida ishtirokchilar kerakli ma’lumotlar bilan ta'minlash va yovvoyi hayvonlarning noqonuniy savdosiga qarshi kurashish muammolarini muhokama qilishmoqda, shuningdek, noqonuniy savdoga qarshi samarali kurashish bo‘yicha texnik bilim va amaliy vositalar bilan o‘rtoqlashishmoqda.

Tadbir doirasida, shuningdek, O‘zbekiston Respublikasi Bojxona qo‘mitasi Milliy kinologiya markazining ishchi itlarni o‘rgatish uchun CITES ro‘yxatidan umurtqali hayvonlarning (sudraluvchilar, qushlar, sutemizuvchilar) hid namunalari to‘plamini topshirish marosimi bo‘lib o‘tdi.

Ta'kidlash joizki, “Markaziy Osiyoda yovvoyi tabiatga oid jinoyatlarga qarshi kurashish salohiyati va yordamini kuchaytirish” xalqaro loyihasi nafaqat Markaziy Osiyo davlatlari, balki har bir davlatning turli idoralari oʻrtasida hamkorlikda olib borilayotgan ishlarning birinchi va ilgʻor shaklidir. U O‘zbekiston Respublikasi Bojxona qo‘mitasi, atrof-muhitni muhofaza qilish tashkilotlari, ekspertlar va jamoat ekologik tashkilotlari salohiyatini o‘zida mujassam etgan.