Davlatobod tumani hokimligi mahalliy davlat hokimiyati organi bo‘lib, hududni ijtimoiy-iqtisodiy rivojlantirish, aholi turmush darajasini yuksaltirish, fuqarolarning huquq va qonuniy manfaatlarini himoya qilish hamda davlat siyosatining joylarda samarali amalga oshirilishini ta’minlaydi.

Hokimlik o‘z faoliyatini O‘zbekiston Respublikasi Konstitutsiyasi, “Mahalliy davlat hokimiyati to‘g‘risida”gi Qonun, O‘zbekiston Respublikasi Prezidenti farmonlari, qarorlari va farmoyishlari, Vazirlar Mahkamasi qarorlari hamda boshqa normativ-huquqiy hujjatlar asosida olib boradi.

Davlatobod tumani hokimligining asosiy vazifalari quyidagilardan iborat:

tumanning barqaror ijtimoiy-iqtisodiy rivojlanishini ta’minlash;
investitsiyalarni jalb etish va tadbirkorlikni qo‘llab-quvvatlash;
aholi bandligini ta’minlash va yangi ish o‘rinlari yaratish;
mahallalar infratuzilmasini rivojlantirish;
ta’lim, sog‘liqni saqlash, madaniyat va sport sohalarini qo‘llab-quvvatlash;
yoshlar siyosati, xotin-qizlarni qo‘llab-quvvatlash va ijtimoiy himoya masalalarini amalga oshirish;
kommunal xizmatlar sifati va hududlar obodonligini yaxshilash;
fuqarolarning murojaatlari bilan ishlash hamda ularning muammolarini hal etish.

Davlatobod tumani hokimligi faoliyati tuman hokimi tomonidan boshqariladi. Tuman hokimi o‘z vakolatlari doirasida hududdagi barcha tashkilotlar, korxonalar, muassasalar va fuqarolar tomonidan bajarilishi majburiy bo‘lgan qaror va farmoyishlarni qabul qiladi.

Hokimlikning boshqaruv apparati hokimlik faoliyatini axborot-tahliliy, huquqiy, tashkiliy va moliyaviy jihatdan ta’minlaydi, xalq deputatlari Davlatobod tumani Kengashi faoliyatini tashkil etadi, hokim qarorlari va farmoyishlari loyihalarini tayyorlaydi hamda ularning ijrosini nazorat qiladi.

Davlatobod tumani hokimligi o‘z faoliyatini ochiqlik, shaffoflik, qonuniylik va xalq manfaatlariga xizmat qilish tamoyillari asosida amalga oshiradi.