Namangan viloyati Davlatobod tumani hokimligi

Tadbirda Namangan viloyati hokimi Shavkatjon Abdurazzoqov, O‘zbekiston Respublikasi Prezidenti huzuridagi Ijtimoiy himoya milliy agentligi direktori Mansurbek Olloyorov, nuroniylar va faxriylar, soha mutaxassislari, ommaviy axborot vositalari vakillari hamda keng jamoatchilik ishtirok etdi.

Mazkur markaz respublikada faoliyatini boshlagan oltinchi hududiy ijtimoiy xizmatlar markazi hisoblanadi. Uning ishga tushirilishi bilan Davlatobod va To‘raqo‘rg‘on tumanlari, Namangan shahri hamda Yangi Namangan tumani aholisi uchun zamonaviy ijtimoiy xizmatlardan foydalanish imkoniyatlari yanada kengayadi.

Markaz yiliga 1 500 nafargacha fuqaroga xizmat ko‘rsatish imkoniyatiga ega. Bu yerda bolalar va kattalar uchun kompleks reabilitatsiya, kunduzgi qarab turish, 0–3 yoshli bolalar uchun erta aralashuv, shuningdek, psixososial reabilitatsiya xizmatlari ko‘rsatiladi.

Eng muhimi, mazkur xizmatlarning barchasi davlat tomonidan moliyalashtiriladi va fuqarolarga vaucher asosida taqdim etiladi. Bu esa aholining ijtimoiy xizmatlardan qulay, sifatli va manzilli foydalanishiga xizmat qiladi.

Tantanali marosim davomida ijtimoiy himoya sohasini rivojlantirishga qo‘shgan munosib hissasi, tashabbuslari va samarali faoliyati uchun Namangan viloyati hokimi Shavkatjon Abdurazzoqov “Ijtimoiy himoya fidoyisi” ko‘krak nishoni bilan taqdirlandi.

Yangi markazning faoliyati hududlarda aholining ijtimoiy himoyaga muhtoj qatlamlarini qo‘llab-quvvatlash, ularga zarur xizmatlarni bir manzilda ko‘rsatish va inson qadrini ta’minlash borasidagi ishlarni yangi bosqichga olib chiqadi.

Davlatobod tumani hokimligi Axborot xizmati