Erta turmush — qadriyat emas, muammo!
2026-02-18 17:20:00 / Yangiliklar
Chiroqchi tumani markazidan olis Dursun mahallasi, 17-maktabda viloyat hokimining o‘rinbosari, Oila va xotin-qizlar boshqarmasi boshlig‘i Ziyoda Aminova rahbarligida erta nikohlarning salbiy oqibatlari, yoshlar o‘rtasida sodir bo‘layotgan jinoyatchilik, ijtimoiy odoblarga doir aniq maqsadga yo‘naltirilgan profilaktik uchrashuv bo‘lib o‘tdi.
Uchrashuvda Inson huquqlari bo‘yicha vakil (ombudsman)ning Qashqadaryo viloyatidagi mintaqaviy vakili Lola Saodatova, viloyat Nuroniylar kengashi, Buvijonlar maktabi rahbari Kommuna Ismoilova, viloyat Oqila ayollar harakati a’zosi Inobat Karimova, viloyat sog‘liqni saqlash boshqarmasi, Ona va bola skrining markazi ginekologi G.Mahmudova, Qarshi davlat universiteti dotsenti, filologiya fanlari kafedrasi mudiri Maxfirat Omonova, QDU doktoranti Saodat Namozova, tuman hokimi o‘rinbosari, Oila va xotin-qizlar bo‘limi boshlig‘i Gulchiroy Soatova, mahalla "yettiligi" keng jamoatchilik hamda mahalla aholisi ishtirok etdi.
Tadbir davomida erta turmushning yoshlar salomatligiga, jamiyatga va oilaviy barqarorlikka salbiy ta’siri haqida atroflicha tushuntirishlar berildi. Qonunchilikka asosan voyaga yetmaganlarning nikohdan o‘tishi taqiqlanishi, bunday holatlar uchun javobgarlik choralari mavjudligi aniq faktlar asosida izohlandi.
Mahalla faollari va aholi vakillari bilan ochiq muloqot tarzida o‘tgan yig‘ilishda oilaviy qadriyatlar, sog‘lom oilaning poydevori — bilimli va yetuk avlod ekanligi haqida fikrlar bildirildi.
Shuningdek, mahalladagi 60-sonli Oilaviy poliklinikada mahalla aholisi uchun chuqurlashtirilgan tibbiy ko‘rik ham tashkil etildi.