Buxoro viloyati hokimligi

Bu jarayonda respublika miqyosida mahallalarda 29 mingta kichik ishlab chiqarish, xizmat koʻrsatish, hunarmandchilik loyihalarini amalga oshirish, zarur qishloq xoʻjaligi texnikalari va asbob-uskunalarini ajratish, aholi xonadonlariga 1,23 million bosh parranda, 24 ming oila asalari, 21 ming bosh qoʻy-echki va qoramol yetkazib berish, 400 ming gektar aholi tomorqalarida va 180 ming gektar ijara asosidagi ekin yerlarida sabzavot-poliz, kartoshka, dukkakli va boshqa serdaromad mahsulotlarni ekib yetishtirish kabi dolzarb vazifalar ijrosiga eʼtibor qaratilmoqda. 

Shuningdek, har bir mahallada yetakchi tadbirkorlar yordami bilan aholi tomorqalarida “Bir mahalla—bir mahsulot” tamoyili asosida mahsulot ekib yetishtirish, “Yashil makon” umummilliy loyihasi doirasida hududni koʻkalamzorlashtirish va obodonlashtirish, ariq va zovurlarni tozalash, suv yoʻllari oʻzanini betonlashtirish, ommaviy hashar va madaniy tadbirlarni tashkil qilish, suv tizimi ogʻir boʻlgan 874 ta mahallani sugʻorish tarmogʻini yaxshilash, zarur holda suv nasoslari oʻrnatish, ijtimoiy madadga muhtoj, kambagʻal oilalarni qoʻllab-quvvatlab, avvalo ularga tomorqadan foydalanish koʻnikmasini shakllantirish orqali daromad manbaini yaratish, mahalla va  qishloqlar markazi, koʻchalar, qabristonlarni obodonlashtirish, ularni koʻkalamzorlashtirish uchun mevali va manzarali daraxt nihollarini oʻtqazib parvarishlash ishlariga jiddiy kirishilmoqda. 
Bugun viloyat hokimligida masʼul mutasaddilar, viloyat hokimining oʻrinbosarlari, agrokompleksga tegishli tashkilot va idoralar, agroklasterlar, tumanlardagi studiyalardan onlayn tartibda tuman hokimlari va ularning qishloq xoʻjaligi boʻyicha oʻrinbosarlari, paxtachilik, gʻallachilik, pillachilik va boshqa tarmoqlarda band boʻlgan taʼminotchi klasterlar, fermerlar ishtirokida boʻlib oʻtgan videoselektor yigʻilishi yuqoridagi Farmoyish va unga muvofiq eʼlon qilingan safarbarlik mazmun-mohiyati, qishloq xoʻjaligida dolzarb vazifalar ijrosiga bagʻishlandi.  

Viloyat hokimi Botir Zaripov olib borgan yigʻilishda viloyatga biriktirilgan masʼul—respublika Veterinariya va chorvachilikni rivojlantirish qoʻmitasi raisi Bahrom Norqobilov soʻzga chiqdi. 

Jumladan, “dolzarb bir oylik” safarbarligi davrida viloyatdagi mavjud 65 ming gektar atrofidagi aholi tomorqalaridan unumli foydalanishni tashkillashtirish, uy xoʻjaliklarida tomorqa va issiqxona faoliyatini jonlantirish barobarida chorvachilik, parrandachilik bilan birga quyonchilik, baliqchilik, asalarichilik kabi qoʻshimcha serdaromad tarmoqlarni yuritish, ijtimoiy muhofaza choralarini kuchaytirish orqali aholi yashash sharoitlarini yaxshilashga doir taklif-mulohazalar, tavsiyalar berildi.

Muhokamada shuningdek, erta bahor mavsumida mahalliy iqlim sharoitida ekin-tikin ishlarini uyushqoqlik bilan tashkillashtirish, ogʻir sharoitda yashayotgan oilalarga uzoq yilga ijara asosida berilgan dala tomorqalarida mahsulot yetishtirishda yaqindan koʻmaklashish, “Yashil makon” umummilliy loyihasi doirasida mevali va manzarali daraxt nihollarini koʻproq oʻtqazish, joylarda suv taʼminoti, sugʻorish tizimini yaxshilash bilan birga, fermer xoʻjaliklari uchun jiddiy sinov boʻlgan ekish mavsumini qizgʻin boshlashga doir koʻrsatma va topshiriqlar berildi.

Taʼkidlanganidek, joriy yil viloyat miqyosida yangidan oʻzlashtirilayotgan 20 ming gektar ekin yeri bilan qoʻshganda, jami 100 ming gektar atrofidagi yerda sanoat uchun qimmatbaho xom ashyo paxta chigitini ekish va bundan 400 ming tonnaga yetkazib “oq oltin” xirmonini koʻtarish maqsad qilingan. Xuddi shunday, viloyatda ayni kunda 65 ming gektar yerda ertangi rizq-roʻz manbai—gʻalla maysalari parvarishi talab darajasida olib borilmoqda. Gʻallakorlikda band boʻlgan 3 mingdan ortiq fermer xoʻjaligi, agroklasterlar rahbarlari zimmasiga dolzarb agrotexnik tadbirlarni kechiktirmasdan bajarish vazifasi yuklandi. 

Bundan tashqari, agrar sohaning pillachilik tarmogʻida joriy yil viloyatimizda 53 ming quti atrofida ipak qurtini jonlantirish va provardida bundan 3200 tonna “kumush tola” yetishtirish maqsad qilingan. Buning uchun mavjud 120 ta inkubatsiya punkti moddiy-texnik ahvolini yaxshilash, shu qatorda ozuqa bazasi uchun tutzorlarni kengaytirish maqsadida qoʻshimcha 5 million tup tut koʻchatini oʻtqazish taqozo qilinmoqda. 

Qishloq xoʻjaligida erta bahorgi dolzarb chora-tadbirlarga bagʻishlangan yigʻilishda masʼul-mutasaddilar zimmasiga shuningdek, viloyatda joriy mavsum koʻzda tutilgan 2 ming kilometrga teng suv yoʻli, ariq va kanallar oʻzanini betonlashtirish, kamxarj aholi xonadonlariga imtiyozli qurib berilgan 3 mingta ixcham issiqxonani koʻpaytirish, xonadonlarda sabzavot mahsulotlari bilan birga gulchilikni ommalashtirish, bogʻ-tokzorlarni kengaytirish chora-tadbirini koʻrishga doir qator vazifalar yuklandi. 

Viloyat hokimligi matbuot xizmati