Iqtisodiy oʻquvlar doirasida viloyat hokimligi kotibiyati mudirining axboroti tinglandi
2025-03-01 17:05:00 / Yangiliklar
Shu nuqtayi nazardan, bugun viloyat hokimligida iqtisodiy oʻquvlar doirasida Buxoro viloyati hokimligining qurilish, kommunikatsiyalar, kommunal xoʻjalik, ekologiya va koʻkalamzorlashtirish masalalari boʻyicha kotibiyati mudiri Amriddin Toyirovning axboroti eshitildi.
Taʼkidlanganidek, Oʻzbekiston Respublikasi Prezidentining 2024-yil 24-dekabrdagi “2025-2027-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari toʻgʻrisida”gi qarori bu borada dasturilamal vazifasini oʻtamoqda.
Sohada olib borilayotgan tahlil va jadal boshlangan qurilish-bunyodkorlik ishlari samarasi oʻlaroq, joriy 2025-yilda viloyatimizda investitsiya dasturi asosida umumiy qiymati 625,7 milliard soʻm mablagʻ evaziga 72 ta inshootda qurilish-taʼmirlash ishlarini roʻyobga chiqarish maqsad qilingan. Bunda 51 ta ijtimoiy soha inshootida binokorlik ishlari yangidan boshlanayotgan boʻlib, 21 ta bino-inshootdagi qurilish-taʼmirlash ishlari oldingi yillardan oʻtuvchi obyektdir.
Mazkur manzilli dasturga “Infratuzilmani rivojlantirish” injeniring kompaniyasi tasarrufida 28 ta, “Yagona buyurtmachi xizmati” injeniring kompaniyasi tasarrufida 5 ta, “Issiqlik taʼminoti” aksiyadorlik jamiyati tizimida 2 ta, Oʻrmon xoʻjaligi tizimida 2 ta, “Buxorosuvqurilishinvest” Davlat muassasasi tizimida 15 ta, Avtomobil yoʻllari boshqarmasi tarmogʻida 9 ta, “Hududiy elektr tarmoqlari” AJ tizimida 4 ta, respublika Moliya va iqtisodiyot vazirligi huzuridagi “Infratuzilmani rivojlantirish” IK tasarrufida 3 ta bino-inshoot bunyodkorligi kiritilgan. Yangidan quriladigan baʼzi inshootlarning loyiha-smeta hujjatlarini tayyorlash, ekspertiza xulosalarini olish kabi tashkiliy jarayon bilan birga, oʻtgan yildan oʻtgan obyektlarda qurilish, mukammal taʼmirlash ishlari jadal olib borilmoqda.
Shuningdek, iqtisodiy oʻquvda Buxoro viloyatining suv taʼminoti va kanalizatsiya tizimlarini rivojlantirish va modernizatsiya qilish loyihasi toʻgʻrisida atroflicha maʼlumot berildi. Ishlab chiqilgan va amaliyotga joriy qilinayotgan loyihalar tufayli Osiyo infratuzilma investitsiyalar banki ishtirokida 437,6 milliard soʻm mablagʻ hisobiga Qorovulbozor, Romitan, Peshku, Kogon, Jondor, Buxoro tumanlari, shuningdek, Kogon va Buxoro shaharlari aholisini toza ichimlik suvi bilan, xuddi shunday, Qorovulbozor, Olot, Romitan, Qorakoʻl va Gʻijduvon tumanlari markazida oqava suv tarmogʻini toʻliq ishga tushirish maqsad qilingan.
Viloyat hokimligi matbuot xizmati