“Payshanba — Yoshlar kuni”: yoshlar bandligi va muammolariga amaliy yechimlar
2026-10-15 10:00:00 / Yoshlar kuni
“Payshanba — Yoshlar kuni”: yoshlar bandligi va muammolariga amaliy yechimlar
Bo‘ston tumani hokimi Sanobarxon Nosirovaning “Payshanba — Yoshlar kuni” munosabati bilan yoshlar bilan uchrashuvi bo‘lib o‘tdi.
Uchrashuvda yoshlarning murojaatlari, takliflari, bandligini ta’minlash, kasb-hunarga yo‘naltirish hamda tadbirkorlik faoliyatini boshlash istagida bo‘lgan yoshlarga amaliy ko‘mak ko‘rsatish masalalariga alohida e’tibor qaratildi.
Ochiq va samimiy muloqot davomida yoshlar o‘zlarini qiziqtirayotgan masalalar yuzasidan bevosita murojaat qilib, ishga joylashish, kasb o‘rganish, tadbirkorlik faoliyatini yo‘lga qo‘yish hamda mavjud imkoniyatlardan foydalanish bo‘yicha taklif va istaklarini bildirdilar.
Uchrashuvning o‘zida 4 nafar yosh o‘zlari qiziqish bildirgan va so‘ragan bo‘sh ish o‘rinlariga ishga qabul qilindi. Bu esa yoshlar murojaatlarini tinglash bilan cheklanib qolmasdan, ularni amaliy natija bilan ta’minlashga qaratilgan ishlarning muhim namunasi bo‘ldi.
Shuningdek, boshqa yoshlarning murojaatlari ham alohida o‘rganilib, ularning qiziqishi, bilim va ko‘nikmalari hamda tanlagan yo‘nalishlari asosida tegishli tavsiyalar berildi. Kasb-hunar egallash istagidagi yoshlar mavjud o‘quv kurslari va imkoniyatlarga yo‘naltirildi, tadbirkorlik bilan shug‘ullanish istagida bo‘lganlarga esa loyihalarini amalga oshirish, kredit va boshqa qo‘llab-quvvatlash mexanizmlaridan foydalanish bo‘yicha tushuntirishlar berildi.
Uchrashuv davomida har bir yosh bilan individual ishlash, ularning muammolarini manzilli o‘rganish va imkon qadar joyida hal etish zarurligi ta’kidlandi.
“Payshanba — Yoshlar kuni” doirasidagi bunday uchrashuvlar yoshlarning muammolarini eshitish, ularni qo‘llab-quvvatlash, bandligini ta’minlash va kelajakdagi rejalarini amalga oshirishga ko‘maklashishda muhim ahamiyat kasb etmoqda.