Baliqchi tumanidagi “Web King” akademiyasida yoshlarning startap loyihalari namoyish etildi
2026-02-19 09:00:00 / Yangiliklar
Tadbirda tuman hokimi Jasurbek Аbdurayimov hamda tuman soliq inspektsiyasi boshligʼi Joʼrabek Maqsudov ishtirok etib, istiqbolli biznes gʼoyalar bilan yaqindan tanishdi.
Taqdim etilgan loyihalar bugungi kunda test rejimida sinovdan oʼtkazilmoqda. Ularning asosiy afzalliklari — zamonaviy yondashuv, raqamli yechimlar orqali qulaylik yaratish, vaqt va resurslarni tejash imkoniyatiga egaligidir.
Jumladan, “E-murojaat” platformasi fuqarolar va davlat idoralari oʼrtasidagi muloqotni raqamlashtirish, kommunal xizmatlar va ijtimoiy masalalar boʼyicha murojaatlarni onlayn qabul qilish imkonini beradi.
“Aqlli Maktab” loyihasi esa sunʼiy intellekt asosida oʼquvchilar bilimini tahlil qilish, ota-ona, maktab va oʼquvchi oʼrtasida doimiy aloqani yoʼlga qoʼyish hamda taʼlim jarayonini avtomatlashtirishga qaratilgan.
“DaftarOn” dasturi kichik va oʼrta biznes subʼektlari uchun qarz hisob-kitoblarini raqamli shaklda yuritish, moliyaviy tahlil qilish imkonini yaratadi.
“BeeExpress” xizmati esa kafe, restoran va doʼkonlar mahsulotlarini tezkor yetkazib berishni taʼminlovchi zamonaviy logistika platformasi sifatida ishlab chiqilgan.
Tuman hokimi loyihalarni amaliyotga keng joriy etish, xususan, maktablar hamda savdo va xizmat koʼrsatish obʼektlarida qoʼllash yuzasidan taklif va tavsiyalar berdi.
Baliqchi tumanida yoshlarni qoʼllab-quvvatlash, ularning innovatsion tashabbuslarini ragʼbatlantirish borasida ishlar izchil davom ettirilmoqda.